28 телын / декабрьыште Республикысе мер-политик рӱдер шке шочмо кечыжым палемда.

Гагарин проспектыште верланыше монументан пӧртын тӱжвал тӱсшат, кӧргыжат Кремльысе съезд-влакын полатшым ушештара. Тудым 8-ше №-ан школын ожнысо верыштыже чоҥымо. А школым изиш тораштырак кумдан ыштыме.

Политпросвещений пӧртым ятыр жап чоҥымо, тидлан эсогыл ЦК КПСС-н кӧнымыже кӱлын. Тыге 1978 ий 28 телын эксплуатацийыш колтымо. Ончыл могыржым Марксын, Энгельсын да Ленинын скульптур барельефышт тачат сӧрастарат. Тудым скульптор-влак Анатолий Ширнин да Сергей Яндубаев ыштеныт.

Ныл пачашан пӧртын вестибюльыштыжо чӱчкыдын тӱрлӧ ончер-влак вераҥдалтыт. Кумда залыште мероприятий-влак (2005 ийыште Тӱнямбалсе X-шо финн-угор калык конгресс, 2008 ийыште Тӱнямбалсе X-шо финн-угор писатель-влакын конгрессше, Марий калык погын-влакын секцийышт да т. м.), кабинетлаште лекций да семинар—влак эртаралтыт.

Мер-политик рӱдерыште тӱрлӧ политический деятель-влакым ужаш логалын: Е. А. Гайдар, В. В. Жириновский, Г. А. Зюганов, К. И. Косачёв да молат.

Рӱдер ондакше Политпросвещений пӧрт маналтын, калыкыште кокымшо лӱмымат сулен: Келшымаш пӧрт. Тыште Российысе йот элласе йодыш-влак дене министерствын офисше, Регионым виктарыше рӱдер, Руш тӱвыра рӱдер, Республикысе ветеран ушем, Общественный Палате, Марий Мер Каҥаш шке пашаштым виктарат.

2018 ий гыч Мер-политик рӱдерым Э.В. Александров вуйлата.