21 декабрьыште 55 ияш лӱмгечыжым Мер Каҥашын еҥже, И.С. Палантай лӱмеш тӱвыра да сымыктыш колледжысе калыкле сымыктыш гимназийын туныктышыжо Лидия Геннадьевна Иксанова палемда.
Тудо 1966 ийын теле тылзын 21-ше кечынже Марий АССР Морко кундем Пектывайсола ялеш шочын. Шинчымашым Кумужъял кыдалаш школышто, варажым Марий кугыжаныш университетыште налын.
«Периодика» издательствыште, Советский районысо Шуарсола да Кельсаксола кыдалаш школышто тӱрлӧ должностьышто, Шуарсола да Марий Элысе Президент калыкле кыдалаш школын вуйлатышыжлан пашам ыштен.
Лидия Иксанова поэт семын 1978 ий гычак почеламутым воза. «Ямде лий!» газетын юнкоржо семын тӱҥалын. Кызыт поэзий тӱняште шке вержым муын, 2003 ий гыч Россий Писатель ушемын еҥже. Тачысе кечылан шке лӱмжӧ уло. Возымо почеламутшылан 100 утла муро йоҥга. «Юмынӱдыр» икымше марий мюзиклысе муро-влакын мутыштын авторжо.
Поэтессын ятыр почеламут сборникше лектын: «Чылажат — шочмо верын», «Йӧратымем, тылат…», «Шыже блюз» да т.м.

Пагалыме Лидия Геннадьевна. Тыланена тумо гай пеҥгыде тазалыкым, мардеж гай писылыкым, йолгорно гай кужу ӱмырым. Тек Тендан мурсаскада мемнам эре куандарен шога. Юмо Тендам, ешдам эре арален шогыжо.
Юбилей дене, пагалыме Лидия Геннадьевна!