17 январьыште Марий Элын кок велныже – Курыкмарий ден Морко районлаште – Тӱвыра идалык торжественно почылтын. Морко кундемын пайремыштыже Марий Оньыжа, Марий Эл Кугыжаныш Погын вуйлатышын алмаштышыже Анатолий Иванов лийын, тушко чумыргышо-влакым поро мут дене саламлен.

Ушештарена: 2014 ийым Российыште тӱвыра идалык семын палемдыме. Ты идалыкым Морко районышто почмо кышкарыште пайрем кас эртен. Тушто районысо икмыняр тӱвыра тӧнеж ден усталык коллектив-влакын лӱмгечыштым пайремленыт. Тыге Изи Кушна социально-культурный комплекс пеленсе «Кушна кундем» ансамбльым ыштымылан 25 ий темын. Шеҥше социально-культурный комплексын «Мастар кид» калык усталык студийже 21 ийыш тошкалын. Тыгаяк ийготыш Чодыраял социально-культурный комплексын «Тӱлемӱдыр» студийже шуын.

Ансамбль ден студийлам вуйлатыше да нунын пашаштым вияҥден колтымашке шке надырыштым пыштыше чолга еҥ-влаклан Анатолий Николаевич Кугыжаныш Погынын Чап Кагазшым, Тауштымашыжым кучыктен.