2015 ий 8-12 июльышто Марий Эл Республике Провой кундем Чакмарий школ пелен Россий кÿкшытан VII марий самырыктукым слёт эртен. Чолга ÿдыр-рвезе-влакым Марий Оньыжа Анатолий Иванов саламлен. Тудо Мер Каҥашын Таумутшым школлан, районлан да самырыкъеҥ-влак Елена Куприянова ден Татьяна Япаевалан кучыктен.

Слётыш Марий Элын кажне гаяк районжо ден олаже, Виче, Одо, Пошкырт, Татарстан, Пермь кундемла, Моско ден Санкт-Петербург олала гыч 67 чолга еҥ ушнен.

Слётын темыже: «Пушеҥгын вийже – вожышто, калыкын – у тукымышто». Ныл кече шуйнышо тунемме да тÿвыра программе моткоч поян да тÿрлö шöрынан лийын. Тыгодым ныл лужа ныл виктыш почеш пашам ыштен. Тиде – «Мер толкын», «Еш илыш йÿла», «Сылнымутчо» да «Самырык этножурналист». тÿрыс Слёт Сеҥымашын 70 ияш лÿмгечыжлан да Сылнымут идалыклан пöлеклалтын. Тыгак самырыктукым вес ийын эртаралтшаш X Марий калык погын нергенат шарналтен.

Ӱдыр-рвезе-влаклан ушеш кодшо лекций-влакым психологий науко кандидат, Югорск кугыжаныш университетысе педагогике да психологий кафедрын доцентше Нина Айварова лудын. Тудо пÿтынь слётлан лекцийым «пуэн» да посна занятий-влакым «Еш илыш йÿла» лужалан эртарен.

Марий Эл Республикысе тÿвыра, печать да калык-влакын пашашт шотышто минстерствыште калыкле да конфессий-влак кокласе кыл пöлкам вуйлатыше Игорь Садовин тÿшка лекцийым лудын, «Мер толкын» да «Самырык этножурналист» лужа-влак дене посна вашлийын.

Сылнымутчо-влак верысе да Йошкар-Ола гыч толшо писатель-влак дене мутланеныт. Нунылан мастар-класс-влакым Светлана Бессонова, Аркадий Богданов, Валерий Григорьев, Валентина Изилянова, Юрий Соловьёв, Татьяна Пчёлкина, Елена Юсупова эртареныт.

Этножурналист-влак деке Озаҥ федерал университетысе электрон СМИ теорий да практике кафедрын доцентше Руслан Бушков ден фотограф Владимир Кравцов толын коштыныт, пайдале занятий-влакым эртареныт. Звениго районысо «Звениговская неделя» газет редакций пашаеҥ-влак денат вашлиймаш кÿлешан лийын.

Тыгак РФ калык-влак кокласе журналистике гильдийым вуйлатыше Маргарита Лянге дене ушеш кодшо семинар эртен. Палемдыман, тудын дене пырля слётын пашашкыже Российын 9 олаже — Барнаул, Иркутск, Йошкар-Ола, Красноярск, Москва, Новосибирск, Саранск, Северодвинск да Сыктывкар — гыч самырык ден опытан журналист-влак ушненыт.

«Мер толкын» лужан иктешлыше пашаже «Марий калык погын» лийын. Тунам шке коклаштышт Марий Оньыжамат ойыреныт. Тиде кугу сомылым Игорь Эштуковлан ÿшаненыт. Тыгак Мер Каҥашыш темлалт кертше еҥ-влакым палемденыт, резолюцийымат пеҥгыдемденыт.

Марий самырыктукымын VII слётшо «Этношÿлыш» фестиваль дене иктешлалтын. Тушто марий, татар, чуваш муро-влак йоҥгеныт, тÿрлö семын куштеныт. Слётыш толшо-влак шке мастарлыкыштым ончыктеныт. Мутлан, самырык этножурналист-влак сценкым, слёт нерген видеоматериалым ончыктеныт.

Автор: Эльвира Куклина.