28 мартыште Марий Элысе мер-политик рӱдерыште (Йошкар-Ола) Мер Каҥашын визымше пленумжо эртыш. Кок тӱҥ йодышым каҥашышт – Мер Каҥашын еҥже-влакын IX Марий калык Погын деч вара паша лектышышт нерген; Регион-влак кокласе Марий мер толкынын негыз кагазше-влак нерген.

Пленумын пашашкыже РФ Кугыжаныш Думын депутатше Лариса Яковлева, Марий Эл правительствын алмаштышыже, республикысе тӱвыра, печать да калык-влак паша шотышто министр Михаил Васютин, тиде министрын алмаштышыже Галина Ширяева, тӱвыра министерствыштак пӧлкам вуйлатыше Игорь Садовин, Республикысе марий тӱвыра рӱдерым вуйлатыше Валерий Григорьев, верысе журналист-шамыч, Мер Каҥаш шошо сессийын икмыняр делегатше ушнышт.

Верла гыч ойлышо-влак, тӱҥ шотышто, калыкле-тӱвыра автономийым ыштыме нерген палемдышт. Тыгай автономий-влак таче Одо, Киров да Угарман кундемлаште, Татарстаныште, Санкт-Петербугышто улыт. Свердловск велне ышташ документым погат. Пошкырт кундемыште тидым ышташ шонат.

Мер Каҥашын еҥже Анатолий Радыгин Марий Оньыжа пелен посна Эксперт Советым ышташ кӱлмӧ нерген ойлыш. Тыгак тудо Марий Эл ден марий-влак илыме регион-влак коклаште правительстве кӱкшытыштӧ келшымаш документым (соглашений) подписатлаш темлыш.

А Регион-влак кокласе Марий калык мер толкынын негыз кагазше-влакын (Устав, кок ӱшандартыш) проектыштым тӱҥ шотышто келшышылан шотлышт да Марий калыкын X Погынлан тӱрыс ямдылен шукташ, тунам вара пеҥгыдемдаш темлышт.

Мер Каҥашын визымше пленумжо иктешлалте, тудын резолюцийжым шотыш налын, сомылым умбакыже виктарыман.

Автор: Эльвира Куклина, этножурналист, блоггер.