1 апрельыште Йошкар-Олаште марий юмынйӱлам кучышо онаеҥ-влакын погынымашышт эртен. Тушто 60 наре еҥ участвоватлен.

Марий Элын тӱҥ онаеҥже Таныгин Александр Иванович погынын пашаже сайын эртыже манын, кумалтыш мутым ойлен да варажым чий йӱлам кучышо республикысе общине-влакын пашашт нерген радамлен. Тыгодым пӱртӱсын вийжым, шым кугу усталык вийым кучылт мошташ, кугу шнуй-влакын сугыньыштым шукташ да поро пашам ышташ кӱштен ойлен.
Тӱҥ онаеҥ уста почеш илымыж годым эре тӱҥ онаеҥ лийын кодеш. А теве республикысе юмынйӱла ушем вуйлатышылан погынышто вес еҥым сайлыме. Ты верыш шуко йӱк дене Йошкар-Оласе «Марий кумалтыш» общиным вуйлатыше Василий Фёдорович Смирновым сайленыт.
Василий Фёдорович Смирнов Шернур район Лажъялыште 1956 ий 28 апрельыште шочын. Оршанке педучилищым (1975), Н.Крупская лӱмеш Марий пединститутым (1981) тунем пытарен. 1981-2004 ийлаште Шернур РОВД-ште пашам ыштен. Тыгак Шернур РОВД-н, судын да прокуратурын комсомол организацийыштын секретарьже лийын. Военный пенсийыш лекмекат, икмыняр вере пашам шуктен. 2013 ийыште Шернур районысо «Марий кумалтыш» общиныш пурен. А тений тудлан Йошкар-Оласе общиным вуйлаташ ӱшаненыт. Ешан, ӱдыр ден эргым ончен кушта.