Марий Эл Республикым вуйлатышын 21 мартыште лекше указше почеш Тӱвыра ден сымыктышым вияҥдымашке кугу надырым пыштымыжлан Республикысе Курчак театрын художественный вуйлатышыже Ямаев Алексей Анатольевичым «Марий Эл Республик сымыктышын сулло пашаеҥже» лӱм дене палемденыт.

Ямаев Алексей Анатольевич 1973 ийыште Йошкар-Олаште шочын. Аваже, Ямаева Галина Николаевна, РСФСР-ын да Марий АССР-ын сулло артисткыже эргыжым изинек театрлан шӱмаҥден. Шке шинчымашыжым Алексей РАТИ-ГИТИС-ыште келгемден. Ик жап Москошто Г.Хазановын вуйлатыме Эстраде театрыште актёрлан пашам ыштен. А 2000 ийыште М.Шкетан лӱмеш Марий национальный драмтеатрыште режиссёр-постановщиклан пашам ышташ тӱҥалын, 2011 ийыште — Курчак театрыште режиссёрлан. 2015 ий годсек — Курчак театрын художественный вуйлатышыже. Тудын шындыме «Старший сын» (А.Вампилов) спектакльже «Йошкар-Ола театральная-2012» фестивальыште Гран-прим сеҥен налын, а Ямаев Алексей эн сай режиссёр паша семын лауреат лийын. «Театр. Дебют.Ялта» III Всероссийский фестивальыште (2016) — «Убийца» (А.Молчанов) пьесым шындымым Гран-при дене палемденыт, шкаланже «Лучшее режиссёрское решение» номинацийыште дипломым кучыктеныт.