Карелий Республикыште марий-влакым «Карелийысе марий-влак» мер организаций иктеш уша. Тудо 2010 ий годсек пашам ышта. Мер организацийым Асессоров Михаил Алексеевич вуйлата. Кодшо кечылаште тудын «Линия жизни. Жизненный путь человека из поколения победителей» книгаже ош тӱням ужын.

Тиде савыктышыште Кугу Отечественный сарын ветеранже Синицин Георгий Сергеевичын пӱрымашыж нерген ойлалтеш. Марий кундемын эргыже Карело-Финский ССР, Ленинград кундемыште кредалын, кум гана пленыште лийын да Белоруссийыште вуйжым пыштен. Тудын нерген материалым умбакыжат погаш да ты савыктышым ешарен лукташ шона.

Асессоров шке землякше Синицин Георгий Сергеевич нерген материалым кужу жап кычалын да иктышке чумырен. Тудын савыктышысе геройжо Курыкмарий район Кӱкшыныр ялыште 1919 ийыште шочын да Йошкар Армий радамыш 1939 ийыште логалын. Икымше кредалмашым Карело-Финский ССР кумдыкышто Выборг ола воктене вашлийын, финн окуупант-влак ваштареш шоген. Вара Лениградысе «Невский пятачок» манме верыште кредалын. Синицын пулемётный расчётын, а варажым стрелковый взводын командирышт лийын. А илыш шӱртыжӧ 1944 ий 6 июльышто Белоруссийысе Браславский район Шакуры ял воктене кӱрылтын.

Автор ты геройым палыше еҥ-влакым кычалеш. Тыгак шке ача-аван, коча-кован сар нерген шарнымашыштым возен моштышо еҥ-влакланат тыгай

шымлыме пашам шукташ темла.