Писатель, журналист Алексей Тимофеевлан шочмо ялыштыже – Волжский район Кукшэҥерыште шарныктыш оҥам почыныт. Чумыргышо калык ончылно Мер Каҥаш лӱм дене ты мер толкынын еҥже Галина Эшкинина поро мутым ойлен.

Тыгак пайрем дене Купсола ял шотан администрацийым вуйлатыше Анатолий Спиридонов, Волжский район администраций вуйлатышын алмаштышыже Владимир Сергеев саламленыт.

Алексей Васильевич Тимофеев 1929 ий 4 февральыште шочын. Купсола шымияш школ деч вара 1943-1944 ийлаште лесотехнический техникумышто тунемын. Бухгалтер курс деч вара Марпотребсоюзышто пашам ыштен. 1956-1958 ийлаште торгово-кооперативный училищыште шинчымашым налын. Урал велне инженер-экономистлан тыршен, Совет Армий радамыште порысшым шуктен. Военный училищыште тунемын. Элым аралыме пашаште лийын. Йошкар-Олашке пӧртылмекыже, Марий пединститутысо историй да филологий факультутетыште шинчымашым поген (1968). Марий радион корреспондентшылан тыршен. Телевидений да радио комитет вуйлатышын алмаштышыжлан шоген.

Армийыште улмыж годымак сылнымутым сераш тӱҥалын. Сар, Шочмо элым аралыме нерген очеркым, ойлымашым возен. 1973 ийыште Кугу Отечественный сарыште кредалше разведчик-влак нерген «Шем курныж» романым савыктен. 1986 ийыште «Койдымо фронт» кокымшо романым пӧлеклен.

Тудо кум книган – кок романын да «Шолем» повестьын – авторжо. Россий писател ушемын еҥже, РСФСР, Марий АССР культурын сулло пашаеҥже.

Алексей Тимофеев латик ий ончыч ош тӱня дене чеверласен. Но тудын суапле пашажым эре шарнаш тӱҥалыт. Тидымак пеҥгыдемдыш, Кукшэҥерыште шарныктыш оҥам почмеке, Купсола тӱҥ школышто писательлан пӧлеклалтше сылне программе: сылнымут мастар, чолга марий еҥын илыш корныжым шергалыныт, тунемше да верысе художественный самодеятельностьын артистше-влак муреныт, куштеныт.

Уверым «Марий Эл» газетын 6-шо февральысе номержылан эҥертен ыштыме.