Пагалыме марий калык!

Марий Мер Каҥаш лӱм дене чыландамат алал кумылын Шочмо йылмын тӱнямбал кечыж дене саламлем!

Кугезына-влак ойленыт: йылме ила гын веле калык ила. Тугеже ме чыланат марий йылмынан волгыдо ончыкылыкшо нерген шонышаш улына. Вет глобализацийлан кöра тÿнямбалне ий еда ятыр калыкын йылмыже пытен толеш. Сандене шочмо марий йылмынам йöраташ да тудын чапше верч ончыкыжымат тавадаҥ шогаш ӱжам.

Мер Каҥаш шке пашаштыже шочмо йылмым арален кодымо йодышлан изи огыл тÿткышым ойыра. Тидын шотышто ий еда ятыр кугу сомыл шукталтеш. Эн кугу вер самырык тукымым шочмо йылмым пагалаш туныктымо йодышлан ойыралтеш. Кызытсе самырык тукымым могай шÿлышаным ончен-куштена – марий калыкнан да шочмо йылмынан ончыкылык пÿрымашыжат лач тугаяк лиеш.

Поснак кугу таум марий йылмым туныктышо-влаклан каласыме шуэш. Вет лач нунын тыршымышт дене марий йылмына аралалтеш да вияҥын толеш. Тыгак марий мер пашаеҥ-влакланат мланде марте вуем савем. Марий калыкнан тÿзланымаштыже нунын суапышт моткоч кугу. Нунын тыршымышт дене марий тӱня утыр куатлырак лиеш да икояныш савырна.

Пагалыме марий калык! Уло кумылын ончыкыжымат шке шочмо йылмынам аклаш, марла вожылде мутланаш, кугезе йӱланам жаплаш да самырык тукымым марий шӱлышеш шуараш ӱжам.

Чылаландат пеҥгыде тазалыкым, кужу ӱмырым, вашла пагалымашым да пиалым тыланем!

Аралыза шочмо марий йылмынам!

Марий Оньыжа
Анатолий Николаевич Иванов.