Советский район Ӱшнур кыдалаш школ кертмыж семын марий калыклан шочмо йылмым йӧраташ, марий йӱлам да йылмым сайын палаш, марий койыш дене илаш примерым ончыкта. Теве школ вуйлатыше, Мер Каҥашын еҥже Валерий Галкинын кумылаҥдымыж почеш кеҥежым ты тунемме вер пелен йоча-влаклан пӧлеклалтше «Изи мӧр пеледыш» пайрем эртыш. А шукерте огыл школышто «Шӧртньӧ шыже» муро конкурс да «Марий Party» каныме кас лийыч.

«Тыгай конкурс икмыняр ий ончыч школыштына йӱлашке пурен шуктен ыле, но тӱрлӧ амаллан кӧра пайрем мондалтме гай лие, а тиде ийын конкурслан у вийым пуаш кумыл лекте. Ты шонымашым школын чолга тунемшыже-влак дене каҥашен нална да чылан пырля рӱж у-тошто пашалан пижна,» — каласкала Ӱшнур школ вуйлатыше Валерий Галкин.

Конкурсыш кажне класс мурым ямдылен. Мотор марий тувырым чиен, йоча-влак шке мастарлыкыштым ончыктеныт. Нуным жюри аклен. Тыге кум тӱшка дене сеҥыше-шамычым ойыреныт. Изирак ийготан-влак коклаште икымше верым Ангелина Горохова налын, кокла ийготан-влак коклаште икымше верыш Анастасия Беляева ден Анна Мамашева лектыч, да кугурак ийготан-влак коклаште — Татьяна Беляева ден Николай Любимов.

Тиде кече «Марий Party» каныме кас дене иктешлалтын. «А касым эртараш тунемше Николай Любимов темлен да шке йолташыже-влак дене пырля организоватлен,» — палемда школ вуйлатыше.

«Марий Party» кас кум шагатат пеле шуйнен, тунам тӱрлӧ сынан марий муро йоҥген, поснак марий такмак-влак почеш уло калык веселан куштен. Каныме касыш школын туныктышыжо ден 9-11 класслаште тунемше деч посна Ӱшнур кундемын самырыкшат да илалшыжат ушненыт. Вет ялыште марий койыш дене илаш лач школ веле, клуб уке.

Автор: Николай Любимов, Эльвира Куклина.