Пеледыш тылзын 23-шо — 25-ше кечылаштыже М.Шкетан лӱмеш Марий драме театрыште финн-угор драматург-влак вашлийыныт. Нунылан «Усталыкым вияҥде» курс эртаралтын. Тиде проект Финляндийысе М.А. Кастрен Обществын полшымыж дене шукталтын.

Курсым режиссёр, драматург, Карелий Республикысе искусствын сулло деятельже Пронин Сергей Сергеевич вӱден. Чылаже 17 еҥ погынен, нунын коклаште марий режиссёр-влак – Алексеев Роман Юрьевич, Ямаев Алексей Анатольевич, Гордеева Эрвина Геннадьевна. Курыкмарий район гыч поэтессе Вассанова Светлана Андриановна толын. Шукынжо, мутат уке, Марий Эл гыч лийыныт, икмыняр самырык еҥже М.Шкетан лӱмеш Марий кугыжаныш драме театр пеленысе усталык лабораторийыште тунемеш.

Тылеч посна Мордва кугыжаныш национальный драме театрын артисткыже Исайчева Екатерина Сергеевна, Удмуртий гыч кусарыше (тудо утларакшым венгр йылме гыч пьесе-влакым кусара) Егоров Александр Викторович лийыныт.

Ты кум кечыште участник-влаклан шым шагаташ паша темлалтын. А ик кечынже кастене нуно М.Шкетан лӱмеш театрыште «Цилиндр» (Эдуардо де Филиппо) комедийым онченыт.

Икымше кечын курсышко толшо-влакым Пронин С.С. режиссёр экспликацийым – ончыкылык спектакльын сай шонымашыжым — ямдылаш туныктен. Тидым шкенжын «Эхо» пьесыж гоч почын ончыктен.

Кокымшо кечын марий драматург Илибаева Мария Каликаевнан у пьесыжым лончыленыт. Тудо «Торешвате солаште – томаша» маналтеш. Курсышко марла умылышо участник-влак марий пьесым лудыныт миеныт гын, моло-влаклан руш текст темлалтын. Варажым кажне еҥ ты пьесе нерген шке шонымашыжым каласен, ситыдымаш ден сайжым палемден. Ты спектакль шушаш тургымышто Йоча да самырык-влаклан театр-рӱдерын репертуарышкыже пурталтеш, ӱшандарен ты театрын сылнымут ужашыжым вуйлатыше, Гордеев Геннадий Филимонович.

«Тиде моткоч пайдале курс, — каласыш Илибаева М.К. — Финн-угор писатель-влаклан тыгай тунеммаш ондак лийынат огыл, шонем. А Пронин Сергей Сергеевич артистын, драматургын да режиссёрын пашажымат шуктен, моткоч кугу шинчымашан еҥ, сандене театр пашан теорийжымат, практикыжымат кӱлеш семын умылтарен мошта».

Кумшо кечын участник-влак вербатим жанр нерген пален налыныт. Вербатим — ХХ-ХХI курым-влак кокласе документ негызеш шындыме театр представлений. Европышто ты жанр кумдан шарлен. Курсышто кузе да могай йӧн дене тудым финн-угор калык-влаклан ончыктымо нерген пырля каҥашеныт. Ынде ӱшанена: «Усталыкетым вияҥде» курсышто налме шинчымаш у сынан марий спектакльымат калыклан ямдылымаште сай лектышым пуа.