2017 ий пеледыш тылзын 2-шо кечынже Марий Эл Республикым вуйлатышын пашажым жаплан шуктышо Евстифеев Александр Александровичын пунчалже почеш, театр сымыктышым вияҥдымашке кугу надырым пыштымыжлан да шуко ий пашам ыштымыжлан М.Шкетан лӱмеш Марий драме театрын артистше Яковлев Эдуард Ивановичлан «Марий Эл Республикын сулло артистше» почётан лӱмым пуымо.

Яковлев Эдуард Иванович 1976 ий 22 ноябрьыште Морко район Йогорсола ялеш шочын. Москосо Малый академий театр пеленысе М.С. Щепкин лӱмеш кӱшыл театр училищым (1998) тунем лектын. Тылеч вара Шкетан лӱмеш Марий драме театрыш пашам ышташ толын да кызытат тыштак тырша. Тӱрлӧ планан рольым модын, ойыртемалтше образ-влакым чоҥен: Оргон — «Тартюф» (Ж.Б. Мольер), Якуш Вöдыр — «Эреҥер» (М. Шкетан), Чопай — «Салика» (С. Николаев), Яичница — «Женитьба» (Н. Гоголь), Алгаев -«Кеҥеж йÿд» (Н. Арбан), Чÿчÿ «Кресÿдыр» (Ю. Байгузин), Селифон — «Свадебные блины» (А. Волков), Кычи — «Ӱдыр сий» (З. Долгова) да молат. Ик эн оҥай, шарнаш кодшо пашажлан С. Чавайнын «Мӱкш отар» драмыж почеш шындыме спектакльыште матрос Епсейым модмыжым шотлаш лиеш. Эдуард Иванович концертым вӱдышӧ, чумырышо семынат шке мастарлыкшым ончыктен, мурен кушташат мастар. Артист койышыжым шочмо Йогорсола ялыштыже эртыше пайремыштат уло кумылын ончыкта. Тений «Татармультфильм» ушемын марий йомак почеш ямдылыме «Маршан патыр» йомакыштат артист Яковлевын ойыртемалтше кӱжгӧ йӱкшым вигак пален налаш лиеш. Почётан лӱм дене уло кумылын саламлена да ятыр сценылаште шкем тергаш, шуко сеҥымашыш шуаш тыланена.