Тений 27-30 сентябрьыште Сыктывкарыште Российыште илыше финн-угор калык-влакын VI погынжо эрта.

Кодшо кечылаште погынын пашаче группыжо погынен. Тудым Коми Республикын Правительстве председательжын икымше алмаштышыже Максимова Лариса Владимировна вуйлата. Эртыше заседанийыш тӱрлӧ министерствын, верысе кучемын еҥышт, тӱвыра, сымыктыш да туныктыш тӧнеж-влакын вуйлатышышт да мер пашаеҥ-влак толыныт, погынлан ямдылалтме йодышым каҥашеныт.
Тыгодым тӱҥ площадкым рашемдыме: финн-угор калык-влакын IV погынжо В.Савин лӱмеш кугыжаныш академический драмтеатр – Коми Республикысе драмтеатрыште эрта. Кызыт ты кугу мероприятий годым тӱвыра дене кылдалтше программе-влакым эртарыме шотышто темлымаш-влакым погат.
Тенийысе погынын темыже — «Российысе финн-угор калык-влак: калыкын икгайлыкше да этнотӱвыра шотышто шуко сынан улмыжо». Погын годым «Йылме. Туныктыш. Науко», «Тӱвыра. Этнофутуризм», «Экологий. Нацийын тазалыкше», «СМИ. Увер технологий», «Самырык тукым: гражданственность, патриотизм, йӱла» секций-влак пашам ышташ тӱҥалыт. «Социальное партнёрство. Бизнес» теме дене йыргешке ӱстел лийшаш. Погын нерген уверым кумдан шарымаште finnougoria.ru сайт пашам ышта. А погын жапыште Медиафорумын погынжо нерген йодыш каҥашалтшаш.
Российысе АФУН вуйверын еҥже Мочаев Валерий Александровичын палемдымыж почеш, финн-угор калык-влакын IV погынышкыжо марий калык лӱм дене 27 делегат да 18 эскерыше каен кертыт. Тышечын Марий Эл гыч — 9 делегат ден 7 эскерыше, Башкортостан гыч – 5 делегат ден 3 эскерыше, Удмуртий гыч – 2 ден 1, Виче / Киров кундем гыч – 3 делегат ден 2 эскерыше; моло регионла гыч – Коми, Парма / Пермь, Югра, Тюмень, Татарстан, Волгоград, Моско, Угарман – ик делегат ден ик эскерыше дене лийын кертыт. Тыгай квотым АФУН-ын вуйверже пеҥгыдемден.

Фотовойзыш: Саранскыште (Мордва Республик) эртыше V финн-угор погынын делегатше-влак — Тӱҥ онаеҥ Таныгин Александр Иванович ден 2012-2016 ийласе Оньыжа Иванов Анатолий Николаевич.