2017 ий вӱдшор / апрель тылзын  7-8 кечынже Уралыште эртыше Марий форум годым Свердловск областьысе тӱшка да профессионал образованийын министрже Биктуганов Юрий Ивановичлан Красноуфимск районысо школлаште тыршымыжлан «За заслуги в развитии образования» нагрудный знакым пижыктышт.
Тиде награде Красноуфимск ола округ деч лийын. А Юрий Иванович Свердловск областьын губернаторжо Куйвашев Евгений Владимировичын Марий Мер Каҥашын эртарыме форумжым саламлыме мутым лудын пуыш да Оньыжа Александров Эдуард Васильевичлан кучыктыш.
Биктуганов Юрий Иванович 1959 ийыште Красноуфимск район Кӱшыл Пугалыш / Верхний Бугалыш ялыште шочын. Свердловск кугыжаныш пединститутын физический факультетшым («Физика дене туныктышо» специальность дене) тунем лектын. Саргая посёлкысо да Приданниково ялысе школлаште директорлан, Красноуфимск ола округын образований управленийжым вуйлатышылан, Свердловск областьысе Правительстве Председательын алмаштышыжлан пашам ыштен. 2011 ий годсек – Свердловск областьысе Правительстве Председательын алмаштышыже да тӱшка да профессионал образованийын министрже. 2012 ий годсек — Свердловск областьысе тӱшка да профессионал образованийын министрже. Пелашыже, кок ӱдыржӧ улыт.