20 февральыште Марий Мер Каҥашын вуйверже черетан погынымашым эртарен.

Тушто ик эн тӱҥ йодышлан Марий форумым эртарыме шотышто каҥашымашым шотлыман. Марий форумын шошо сессийжым Киров олаште 2018 ийын вӱдшор (апрель) тылзын 13-14 кечылаштыже эртараш кутырен келшыме. Тидлан пашаче комиссийым ыштыме да тушко пуртышаш еҥ-влакым палемдыме. Комиссийыш Александров Эдуард Васильевичым, Мочаев Валерий Александровичым, Садовин Игорь Геннадьевичым, Макаров Александр Ивановичым, Кудрявцев Алексей Григорьевич, Унженин Владимир Васильевичым пурташ кутырен келшыме. Кызыт тушко кайышаш еҥ-влакын спискыштым чумырат.

Вес йодыш тений кеҥежым Россий кӱкшытан Марий самырыктукымын Х слётшым эртарыме шумлык лийын. Тудым сӱрем / июль тылзыште Шернур районысо Марисола кыдалаш школышто эртараш кутырен келшыме. Ты шотыштат пашаче комиссийым чумырымо. Слётлан ямдылалтме тӱҥалтыш паша-влакым шукташ, вуйверын кӱштымӧ пунчалже-влакым илышыш шыҥдараш оналмаш Мочаев Валерий Александрович ден самырык-влак дене паша комиссийым вуйлатыше Григорьев Михаил Григорьевичлан ӱшаныме.

Ужына: мер илыш икшырымын кая, мер пашаеҥ-влак тӱрлӧ погынымашым, каҥашымашым тарватат, ончыкылык илыш нерген шонкалаш, у пашалан таратат. Мер Каҥашын тарватыме йодышлажат илышыш шыҥдаралташ полшат да марий-влакын илыме тӱрлӧ вершӧрыштӧ у мероприятийым ышташ ӱжыт. Марий форум ден слётат тыгаяк улыт.