Идым тылзын 23-шо кечынже Татарстан Республик Агрыз район Буймо села марий калыкын талантан еҥже-влакын погынымо верышкыже савырнен. Тысе тӱвыра пӧртыштӧ регион-влак кокласе «Йоҥгалт, гармонь йӱк!» фестиваль эртаралтын.

 

Марий семым йӧратыше самодеятельный мурызо да гармоньчо-влак Буймышко ынде кумшо гана чумыргеныт. Тушто шке мастарлыкшым Башкортостан, Удмуртий, Марий Эл, Татарстан Республикыла ден Свердловск область гыч 42 гармоньчо ден икмыняр фольклор коллектив ончыктен.

Фестивальыш Марий кундем гыч Марий Оньыжа Александров Эдуард Васильевич, Марий тӱвыра рӱдерым вуйлатыше, Мер Каҥашын еҥже Пушкина Наталья Васильевна, Волжский район Руш Шайра тӱвыра пӧрт пеленысе «Гармоньчо» ансамбль (вуйлатышыже – Николаев Владимир), мурызо Орлова Любовь, уста гармоньчо Петрова Эльвира ден музыкант Нагорин Владимир миен коштыныт. Тыгак чумыргышо-влаклан Йошкар-Оласе «Сайвер» ателье марий вургем ден арверым темлен.

Марий Эл Республикым вуйлатышын алмаштышыже, тӱвыра, печать да калык-влакын пашашт шотышто министр Васютин Михаил Зиновьевичын саламлыме шомакшым Марий тӱвыра рӱдерын директоржо Пушкина Н.В. лудын пуэн. Вара зал марий калыкын Оньыжажым совым кырен рӱж вашлийын. Эдуард Васильевич саламлыме шомакым ойлымыж годым ты тӱвыра мероприятийын кӱлешлыкшым палемден да музыкальный пӧлек шотеш гармонь дене Волжск-Морко вел сӱан сем-влакым шоктен.

Российысе марий-влакын калыкле-тӱвыра автономийжым вуйлатышын алмаштышыже, Татарстанысе марий-влакын тӱҥ онаеҥышт, Мер Каҥашын еҥже Третьяков Олег Александрович марий пайремыш «Курмызык сем» коллектив дене миен. Нунын дечат саламлыме пӧлек гармонь почеш муро лийын. Ансамбль тошто марий мурым шергылтарен, а семӱзгар дене Олег Александрович шоктен.

Фестивальыште гармонь да тальянке дене шоктен моштымо мастарлыкым ятыр участник ончыктен. Ончаш толшо калыкым сайын сӧрастарыме сценат, пайрем нерген видео гоч каласкалымашат куандареныт. А мероприятий мучаште погынышо калык кандырам пунен куштен. Тиде фестиваль марий калыкын шке йӱлажым, тӱвыражым арален кодымо шотышто ятыр тыршымыжым, поро пошкудыжо-влаклан куаным конден моштымыжым да каныш кечым пайдалын эртарен моштымыжым эше ик гана пеҥгыдемден.