2017 ий идым тылзын 18-ше кечынже Татарстан Республик Менделеевск район Элнет кундемын ик эн чолга марийже – Татарстан Республикысе культурын сулло пашаеҥже — Мальгин Геннадий Александрович 65 ийым темен. Ты лӱмгечым вашлийме да творчествыжлан 40 ий темме лӱмеш 22 сентябрьыште Элнет тӱвыра пӧртыштӧ «Йолташ-влак коклаште» усталык касше эртен.

Татарстанысе Асаново совхоз техникумым «Агроном» специальность дене тунем пытарыше пӧръеҥ эше 1979 ийыште шочмо ялыштыже «Элнет» фольклор ансамбльым чумырен да вуйлаташ тӱҥалын. Ты коллектив вес ийынжак Озаҥ олаште эртыше Татарстан Республикын фольклор пайремжын лауреатше лийын. 1981 ийыште идалык мучко Марий кундемын тӱрлӧ верлаштыже шке мастарлыкшым ончыктен. Тунамак МарГУ-н «Рия-рия» ансамбльже дене пырля Марий телевиденийыште концерт программым войзеныт. Варажым тидым «Кумыл сем» («Мелодия души») грампластинкыш пуртымо. А 2004 ийыште ансамбльын уста участникше-влак Таллинныште (Эстоний) эртаралтше «Балтика» финн-угор фестивальышке миен коштыныт.

Ансамбльын аккомпаниаторжылан Геннадий Александровичын пелашыже, Роза Семёновна Мальгина, пашам ышта. Ятыр жап почтальон сомылым шуктен. 30 августышто тудынат чесле лӱмгечыже лийын. Тудынат тӱвыра пашаште шуктымо надырже ситышын. Теве 23 сентябрьыште Роза Семёновна Агрыз район Буймо тӱвыра пӧртыштӧ эртарыме «Йоҥгалт, гармонь йӱк» фестивальыште шке мастарлыкшым ончыктен.

А пытартыш жапыште Мальгин Г.А. эше кок ансамбльым – йоча-влаклан «Шӱшпык» да илалше-влаклан «Кугезе сем» — чумырен.

Марий тӱвырам йӧратыше ты еҥ — тыгак уста кидмастар. Тудо пушеҥге гыч тӱрлӧ ӱзгар-влакым ынде ятыр ий пӱчкеда. «Икана «Элнет» ансамбльын номержылан пу совла-влак кӱлыныт, сандене тудым шке ышташ пижынам. Вара тӧрза сергам (наличникым) ышташ тунемым», — ойла юбилярна. Кызыт Мальгинын пашажым ятыр еҥын пӧртыштыжӧ ужаш лиеш. Тудо пу ӱзгарже-влакым марий узор-влак дене сӧрастара. Нуныжым автор шкеак шонен луктеш. Моторын возымашым – каллиграфийым – уло кумылын шукта. Кажне гана Геннадий Александрович концерт афишым моторын серен шында. «Тӱвыра пашаеҥ-влакын шуктымо сомылышт калыкын кумылжым мероприятий нерген увертарымашат нӧлтышаш», — ешара тудо.

Мальгин Геннадий Александрович жапше годым Монашево ял шотан илемын депутатше семын тӱрлӧ сомылым ворандараш полшен. Тыгак кидмастар йыдалым ышташ тунемнеже.

Мальгин Г.А. — мер пашаштат палыме еҥ. 2009 ий годсек Менделеевск районысо марий-влакын калыкле-тӱвыра автономийыштым вуйлата. Геннадий Александрович Йыван Кырлан 100 ияш лӱмгечыже лӱмеш (1909-2009) «Калык верч тыршымаш» шарнымаш медаль да «За достижения в культуре Республики Татарстан» медаль дене палемдалтын.