![](http://mer-kanash.ru/wp-content/uploads/2021/06/Fkh7WEZoKSk-1024x1024.jpg)
Эртыше кугарнян, 28 аган, Йошкар-Оласе марий активын погынымашыже эртен. Тушко тӱрлӧ пагытыште лийше Мер каҥаш вуйлатыше-влакым, Йошкар-Ола гыч XI Марий калык погыныш сайлалтше делегат-влакым, марий мер ушем-влакын, землячестве-влакын вуйлатышыштым ӱжмӧ.
![](http://mer-kanash.ru/wp-content/uploads/2021/06/Ld4mHc5p4aY-1-1024x1024.jpg)
Пайрем кумылым В.И. Ленин лӱмеш тӱвыра полатын «Ныжыл сем» фольклор ансамбль пуртен. (Вуйлатыше Н. А. Макарова).
Мер Каҥаш Йошкар-Ола администрацийлан XI Марий калык погыным эртараш полшымылан таум каласен. Кугу пашаш делегат-влакым Йошкар-Ола администрацийын пашаеҥышт, мэр Е. В. Маслов, шкежак ужатен. Варажым нуно шучко чер шарлыме жапыште, делегат-влакын тазалыкше нерген азапланен, тестым ышташлан йӧным ыштеныт, эсогыл спонсорымат муыныт. Тыгак администрацийын пашаже Погын жапыште Йошкар-Оланам волгалтарен, сӧрастарыме денат ойыртемалтын. Тӱвыра программыштат нунын надырыштым палемден кодымо.
![](http://mer-kanash.ru/wp-content/uploads/2021/06/KQfK4s3Lcg4-1024x1024.jpg)
Ты погынымаште марий актив ончылно Йошкар-Оласе 14-ше №-ан гимназийын туныктышыжо Валентина Михеева гимназийыште йоча-влак коклаште марий шӱлышым аралыме да вияҥдыме нерген чон вургыж ойлен.
![](http://mer-kanash.ru/wp-content/uploads/2021/06/VxygHE3HFRU-1024x1024.jpg)
Шукерте огыл Йошкар-Олаште почылтшо турист увер рӱдерын пашаже да рӱдолаштына туризм вияҥме нерген тудын вуйлатышыже, Мария Иванова, марий йылме дене чаткан шке декше калыкым савырен.
![](http://mer-kanash.ru/wp-content/uploads/2021/06/LmS8XztN8VY-1024x1024.jpg)
«Мари» сийгудо директорын алмашыже Андрей Васильев сийгудын «илышыж» нерген ойлымыж годым палемден, марий кочкышым йӧратыше-влак ятыр улыт, но ресторан деке миен шуаш оласе корно пеш начар.
Оласе марий актив рӱдӧ оланам эшеат марлаҥдаш манын тӱрлӧ ой-каҥашым пуеныт. Ой-влак коклаште у чоҥалтше урем-влаклан марий еҥ-влакын лӱмыштым пуаш, Марий самырык театр ончыл верлан марий тӱсым пурташ, Талешке площадьым чоҥаш, С.Чавайн лӱмеш литератур тоштерым почаш да т.м.
Погынышо-влак Йошкар-Ола администраций пелен марий-влакын советшым чоҥеныт, тушко 20 еҥ пурен. Советын вуйлатышыжлан Оналмаш Валерий Мочаевым, алмаштыше-влакым Марина Почтеневам да Михаил Александровым шогалтеныт.
Тыгай погынымаш идалыклан кок гана лийшаш: шошым да шыжым. Советшым председатель кок тылзыште ик гана погаш сӧрыш.
Обсуждение закрыто.