«Марий национальный конгресс» мер организацийым ыштымылан 26 мартыште 15 ий темын.

Тидын лӱмеш М.Шкетан лӱмеш Марий театрыште организацийын исполком членже-влак погыненыт да пашам ворандарыме нерген мутланеныт. А тиддеч вара поро кумылым ончыктымо концерт лийын.
Конгрессым тӱрлӧ жапыште М.Шкетан лӱмеш Марий театрын ончычсо художественный вуйлатышыже Иванов Сергей Иванович, директоржо-влак Актанаев Владимир Иванович ден Русанов Юрий Петрович, Йоча да самырык-влаклан театр-рӱдерын директоржо Эдуард Васильевич Александров вуйлатеныт. А 2016 ий годсек тудым М.Шкетан лӱмеш Марий театрын директоржо Матвеев Михаил Иванович вуйлата. Исполком председательлан МарГУ-н преподавательже Ишалин Анатолий Сергеевичым сайлыме ыле.

Ты ганат мер ушем ыштышаш пашаже-влакым ончен лектын. Исполкомын еҥже-влак (33 еҥ) культурно-просветительский пашам утларак вияҥдаш палемденыт. Нуно республикысе районлаште «Яндар памаш» акцийым, «Марий предприниматель» семинарым, книгам погымо да ялласе библиотеке-влаклан пӧлеклыме акцийым да молымат эртарыме нерген ойленыт. Тыгак Марий Эллан 100 ий темме лӱмеш ятыр мероприятийыште участвоватлаш шонат.
«Таче «Марий национальный конгрессым» кеч моктышт, кеч вурсышт, но тудо уло да пашам ышта», — погынымаште да сцене гычат вуйлатыше Михаил Матвеев пеҥгыдемден каласен.Фотовойзыш: Матвеев М.И. ден Ишалин А.С.