17-18 ноябрьыште Карелийыште «Марийцы под небом Карелии» фестиваль эртаралтын. Ты мероприятий «Содружество народов Карелии» мер организацийын «Десять в квадрате» проектше почеш лийын да Петрозаводскысо «Акрет мари» (вуйлатышыже – Войтович Алевтина) ансамбльлан лу ий теммылан пӧлеклалтын.

Фестивальын участникше-влак марий калыкын тӱвыраж дене хореографий ден фольклор мастер-класслаште, йӱла вургем нерген лекцийлаште да творческий коллектив-влакын иконцертлаштышт палыме лийыныт.

Тушко Кужэҥер район Йывансола тӱвыра пӧртын «Мурсескем» фольклор ансамбльже (вуйлатышыже – Каменщиков Евгений) миен коштын. Нуно эн ончыч Петрозаводскышто Йоча да самырык-влакын усталык полатысе краеведений тоштерым онченыт. Тысе организатор-педагошо-влак Файзырхманова Евгения ден Савельева Анастасия Карелий мланде да карел-влакын илышышт нерген интерактивный йӧн дене каласкаленыт. Тиде вашлиймаш годым уна ден пашаеҥ-влак икмыняр тӱрлӧ шудо чайым тамлен онченыт.

Марий Эл Республикысе тӱвыран сулло пашаеҥже Евгений Каменщиков Карелийысе марий-влакым тора кундемыште йӱланам жаплен илымылан да лач фестиваль годым марий лукым почмылан тауштен. Ынде Петрозаводскысо ты полатыш мийыше еҥ-влак марий йӱла дене кылдалтше экспонат-влакым ончен да шымлен кертыт.

Вес кечын фестивальын участникше-влак Сегеж олашке кудалыныт. Ола Карелийын йӱдвел ужашыштыже, Петрозаводск деч 250 меҥге тораште, верланен.

Эн ончыч Сегежысе тӱвыра да каныме рӱдерыште районышто илыше марий да мер ушем-влакын еҥышт дене вашлиймаш лийын.

Ты кечын Сегеж районысо рӱдӧ библиотекыште Национальный кыл рӱдерым почмо. Тушто «Марийцы Карелии» мер организаций дене пырля ворандарыме паша нерген каласкаленыт.

Марий калыкын тӱвыраж, йӱлаж да илышыж нерген каласкалыше выставке ден тоштер сынан лукшымат тыгак лӱмдымӧ. «Марийцы Карелии» организацийым вуйлатыше Асессоров Михаилын шонымыж почеш, тиде лукым ончыкыжым выставке семын школлашке да пайремлашке кондыштараш тӱҥалыт. Организацийын исполнительный директоржо Войтович Алевтина рӱдерлан марий сылнымутчо-влакын книгаштым, а марий луклан Марий кундемысе кидмастар-влакын пашаштым пӧлеклен.

А варажым рӱдерын творческий коллективышт дене пырля Карелийыште илыше марий-влакын «Акрет мари» ансамбльышт, Петрозаводскысо кугыжаныш консерваторийын финн-угор музык кафедрын студентше-влак, «Мурсескем» ансамбль выступатленыт.

Ончаш толшо-влак калык куштымашым да 100 ияш акретле вургемым ужын, ӱдырамашын пӱрымашыж нерген ожнысо да кызытсе муро-влакым колыштын кертыныт. Еҥ-влак, поснак Финляндийын Петрозаводскысо консульствын еҥже, марий калыкын сӧрал вургемже да мурымо мастарлыкше нерген концерт деч вара участник-влак дене кужу жап мутланеныт.

А кастене фестивальын участникше-влак Сегеж олам мучко ошкыл эртеныт. Тыгодым марий мурым муреныт, марла мутланеныт. Корнышто вашлиялтше еҥ-влак шыргыжалыныт, кидыштым нӧлтеныт да «Марийцы, молодцы!» манын куанен кычкырленыт. Тыге уна-влакат Карелийыште марий калыкым шке шӱм-чонышт денак шижыныт.

Фестиваль 18 ноябрьыште мучашлалтын, а «Мурсескем» ансамбльын участникше-влак Кондопога районысо Кивач водопадым ончаш миен коштыныт, ты кумдыкысо тоштерыш, дендрарийыш пурен лектыныт. А вара 80 меҥгым кудалмеке, угыч нуным Петрозаводск вашлийын, олан рӱдыштыжӧ палыме да сӧрал верлаж дене палымым ыштен.

Шагал марий калык илыман тора Карелий мландыштат марий муро йоҥга, марла мутланат да тавалтат. Тидыже марий-влак верч кугешнаш тарата.