Шергакан марий калык!

Марий Мер Каҥаш лӱм дене тендам Марий автономийым ыштыме кече да Калыкын икоян улмо кечыж дене уло кумылын саламлем.

Нине пайрем-влак кажне еҥын чоныштыжо патриотизм шӱлышым шочыктат, шочмо элым йӧраташ, тӱрлӧ калык дене икоян лияш таратат. Тек тыгай шижмаш-влак шӱм-чоныштыда ӱмыр мучкылан аралалт кодыт. Республикнан да калыкнан историйыштым, тачысе кечым ончалмек, ме чыланат кугешнышаш улына. Эртыме корнышто калыкна ден кундемнан чапыштым кугезына-влак тӱрлӧ сарлаште арален кертыныт. Автономий марий калыклан озанлык да тӱвыра илышым, тунемме пашам вияҥдаш йӧным пуэн.

Таче ме 21-ше курымышто илена да у сеҥымаш-влак верч тыршышаш улына. Кызыт кажне марий еҥын чоныштыжо ик шонымаш: тек Марий кундемна вияҥеш да у тӱсым налеш. Тидлан кумда тӱняште илыше марий калык ончыкыжымат кугун полшен шогаш да тидын верч марий калык уло моштымашыжым да уш-акылжым пыштен тыршаш тӱҥалеш манын ӱшаныме шуэш. Шочмо йылмым, кугезе йӱлам да тӱвырам переген илымына Марий Эл Республикынан, марий калыкын утыр вияҥ толмыштлан негызым пышта да волгыдо ӱшаным пуа.

Пеҥгыде тазалыкан, пиалан, поро кумылан лийза. Пайрем дене!

Марий Оньыжа Александров Эдуард Васильевич.