Шергакан марий калык.

Вӱдшор тылзын 26 кечынже, ме марий-влак, иктеш пырля погынен, я кажныже шке кундемыштыже, Марий талешке кечым палемдена. Тӱрлӧ пагытыште калыкна верч тыршыше талешкына-влакым шарналтена, нунылан, тауштен, вуйнам савена. Тидын дене ме ик пеҥгыде вож гыч улмынам ончыктена, марий калыкын волгыдо илышыж верч тыршаш талешкына-влак деч вий-куатым налына.

Кумло ий Марий талешке кече ик ой дене эртен. 2020 ий мемнан деч кугырак тӱткышым ойыраш йодеш да икмыняр ойыртемым пурташ темла. Талешкына-влакым шарныме декаде 26 вӱдшор гыч 9 ага марте эрташ тӱҥалеш. Тӱнямбалне коронавирус шучко чер шарлымылан кӧра иктеш пырля чумырген огына керт, садланак верлаште тӱрлӧ йӧным кучылтын, талешке-влакым шарныман. Тоштыеҥ радамыште улшылан сортам чӱктен, вуйым савыман, илыше талешкылан сотокылым, Интернет йӧн але же теле да радио дене пайдаланен саламлыман.

Шарныза, калыкнан илыме курымыштыжо тӱрлӧ чер, тӱрлӧ туткар лийын. Мемнан кугезе талешкына-влак ик йол ошкыллан шеҥгек чакнен огытыл, саманын тӱрлӧ ийыштыже нуно калыкым азап, осал пӱрымаш деч кораҥден да арален моштеныт, сандене ме тыныслык жапыште илена. Кызытсе илыш мемнан дечат тидым йодеш.

Ӱшанем, пырля ыштыме сомылна тиде неле жапым писын кораҥда, калыкнан ончыкылык илышыже волгыдо корно дене эрташ тӱҥалеш. Лач калыклан ыштыме поро паша мондалтлыме кышам кода.

Марий Талешке кече дене.

Марий Талешке кече декадым кундемлаште кузе эртарыме нерген Мер Каҥашыш шижтараш йодам.

Марий Оньыжа Э.В. Александров