Марий тиште кече 1998 ий годсек кугыжаныш пайремлан шотлалтеш. Тений тудо 19-ше гана палемдалте.

Ты пайрем лӱмеш ятыр мероприятий республикыштына веле огыл, марий-влакын илыме моло кундемыштат лийын. Книгагудылаште «Марий тиште кече» книга ден сӱрет выставке-влакым ямдыленыт. Тыгак «Марла чын возена» тӱшкан возымо диктант тений 6 декабрьыште кудымшо гана эртаралтын. Диктант текстын вуймутшо — «Шупашкар вӱдаралтыш».

Йошкар-Олаште МарГУ-со аудиторийыште 150 еҥ серен, а марий-влакын илыме моло кундемыштышт йоҥылыш деч посна возен моштымыштым 2000 утла еҥ терген. Мо куандара: марий-влаклан Татарстаныште, Башкортостаныште, Киров областьыште. Санкт-Петербургышто, Японийыште, Австрийыштат марла диктантым эртарыме. Вес кундем гыч 67 йодмаш лийын. Теве Австрийысе Вена университетыште тӱрлӧ эл гыч мийыше финн-угор йылмылам тунемше кандаш студентат возен, нунын коклаште марла возышат лийын.

Мер Каҥашын еҥже Тимиряева Иннан мутшо почеш, Калтасаште тений кугыеҥ-влакат икымше гана диктантым сереныт. Ты акцийыш 36 еҥ ушнен.

Мер Каҥашын вес еҥже Тоймакова Галина 6 декабрьыште Оршанке районышто марий йылмым туныктышо ден книгагудо пашаеҥ-влак дене диктантым эртарен, а 8 декабрьыште кугурак класслаште тунемше-влаклан ты текстым лудын. Диктантым Мер Каҥашын моло еҥже-влакат диктантым возымо акцийыш икымше гана ушненыт.

Марий тиште кечылан ик эн кугу мероприятий М.Шкетан лӱмеш драмтеатрыште 10 декабрьыште эртен. Тудо «Ме марий улына» фотовыставке дене почылтын. Тушто республикым вуйлатыше Евстифеев Александр Александрович лийын да погынышо калыкым пайрем дене саламлен.

А вара «Марий мунло» интеллектуал модыш эртаралтын. Тушто марий тӱня, сылнымут, тиште кече, моло марий пайрем-влакын историйышт, йӱлашт нерген йодыш-влаклан чын вашмутым пуаш кӱлын. Тидлан улыжат ик минут пуалтын. Команде-влак (тыште куд еҥ лийын) йодышлан вашмутым кычалыныт. Тыште Марий Мер Каҥашын «Мер Каҥаш» командыже икымше верым сулен налын. А Гран-при Волжск олан «Юлмари» командыжлан логалын.

Умбакыже пайрем театрын сценыштыже шуйнен. Марий тиште кече дене Марий Эл Правительстве вуйлатышын икымше алмаштышыже Васютин Михаил Зиновьевич республикым вуйлатыше да шке лӱмжӧ дене саламлен. Тудо тыгак Россий композитор-влак ушемын Марий Элысе пӧлкажым вуйлатыше Кульшетов Валерий Дмитриевичлан ятыр жап шуктен шогымо суапле пашажлан «За заслуги перед Марий Эл» орденын медальжым кучыктен. Тыгак калык ончыко оньыжа Александров Эдуард Васильевич лектын саламлен, тыгак марла чын возаш туныктымаште тыршыше чолга марий туныктышо-влаклан тауштымаш серышыже-влакым кучыктен. Тыгак Марий Элысе тӱвыра, печать да калык-влакын пашашт шотышто министрын алмаштышыже Ширяева Галина Степановна, пайрем дене саламлышыжла, марий калыкын тӱвыраж, возыктышыж да книга савыктыме пашаж вияҥ толмо нерген ойлен. А вара погынышо калыклан М.Шкетанын романже негызеш шындыме «Эреҥер» спектакль ончыкталтын.