2017 ий ага/май тылзыште «Татармультфильм» ушем «Волжские богатыри» книгам савыктен луктын. Тушто татар-влакын Камыр-батыр, руш-влакын Вольга, марий-влакын Маршан, удмурт-влакын Селта, мокша ден эрзя-влакын Сабан, чуваш-влакын Иван-батыр персонажышт нерген йомак-влакым пуртымо.

Эн ончыч «Татармультфильм» Юл кундемысе нине патыр-влак нерген икмыняр мультфильмым ямдылен. Нуно кум йылме дене ышталтыныт: татарла, рушла да национальный герой-влакын йылмышт дене. Марла мультфильмын геройжо-влак М.Шкетан лӱмеш Марий драмтеатрын артистше-влакын йӱкышт дене мутланат. Маршанын рольжым Яковлев Эдуард йӱкаҥден, Саксайыным –Егошина Алина да Шӧртньӧ Дивыным – Ефимов Павел. Нуно «Татармультфильм» ушемын студийышкыже лӱмынак миен коштыныт.

«Татармультфильм» ушемын студийжым вуйлатыше Ганиев Азат Маратовичын мутшо почеш, «Маршан» марий да моло йомакымат пашаеҥже-влак шкешт шонен луктыныт, вет ожнысо йомак-влак тачысе илышын йодмыжлан келшен огыт тол, эре осал паша ончыкталтеш. А марий патыр нерген возымаште полышым Озаҥ федеральный университетын доцентше, этнолог, журналист, историк Бушков Руслан Аркадьевич, Татарстан кундемысе марий-влакын калыкле-тӱвыра автономийжым вуйлатыше, Агрыз район Кӧлегеш школым вуйлатыше Олег Александрович Третьяков да филологий науко кандидат, МарГУ пеленысе Финно-угроведений институтын доцентше Лидия Сидоровна Матросова пуэныт.

Но историйыште Маршан патырнан лӱмжым келгын шымлыме огыл. 1930 ийыште Волаксолаште «Маршан патыр» промколхоз ышталтын. Тудо «Марлесхимсоюзын» озанлыкше лийын. А 1947 ийыште «Маршан патыр» промартельын правленийжым Весшӱргӧ ялышке кусареныт. Кызыт Морко районышто Изи Маршан ден Кугу Маршан ял-влак, Маршан курык улыт.

1918 ийыште савыкталт лекше «Марла календарьыште» журналист Коведяев Иван Николаевич 912 марий лӱмым ончыктен. Нунын коклаште Маршан патырымат ушештарыме. Учёный-этнограф Четкарeв Ксенофонт Архиповичын «Марийские сказки» книгаштыже палемдыме почеш, Акпатыр ден Чоткар патыр семынак Маршан патыр марий калык верч чот шоген.

Тыште «Маршан патыр» марий йомак почеш мультфильмым ончен кертыда. /vk.com/club120135543?z=video-72924413_456239164/f5522..