Удмурт Республикыште марий калыкын Семык пайремже тений пеледыш / июнь тылзын 10-шо кечынже Грах район Почиҥга / Иж-Бобья ялыште эрта.

Тысе марий-влак Семыкым кугу пайремлан шотлат, Пеледыш пайрем семынак аклат да ятыр уна-влакым вучат. Сандене одо марий-влак ты гана Удмурт Республикым вуйлатышын пашажым жаплан шуктышо Бречалов Александр Владимировичым ӱжыныт. Тудо толаш сӧрен. Тыгак Татарстан, Башкортостан, Марий Эл, Киров кундемла гыч делегаций-влак мияш лийыныт.

Палемдыме деч ик кече ончыч марий йӱла почеш Марий Вожай ял воктенысе кӱсотышко кумалаш лектыт. Нуно Семык пайремым шот да радам дене эртарен колташ, пӱртӱс полшымо дене Ош Кугу Юмына деч игечым, йӧным йодыт.

Ты кечынак 20 шагат кастене Иж-Бобья ялысе тӱвыра пӧртыштӧ «Ял ӱмбалне мужыр йӱксӧ» художественный фильм ончыкталтеш. Ты жапыштак Грах селаште «Лидер» тӱвыра пӧрт пеленысе площадкыште самырык-влаклан марла мурымо-куштымо кас эртаралтеш.

Семык пайремым торжественно почаш, ойла Калык-влакын келшымаш пӧртыштын вӱдышӧ методистше Папаева Виктория Викторовна, пеледыш тылзын 10-шо кечынже 11 шагатлан палемдыме. А вара тӱҥ сценыште марий коллектив-влакын выступленийыштым ужаш лиеш. Шуко тӱрлӧ площадке-влак пашам ышташ тӱҥалыт. Марий кидмастар ӱдыр-влак «Тыматле Чачавий» таҥасымаште шкем терген кертыт, куштызо-влак — «Эн уста тавалтышыште», марий патыр-влак — «Марий патыр» конкурсышто. Икшыве-шамычлан марий модыш-влакым илышыш пуртымо шотышто «Йоча модыш вер» площадкым келыштарат.

Тылеч посна пайремыште марий кочкышым ышташ тунемаш йӧн уло. Тидлан лӱмынак «Подкогыльо» ден «Команмелна» мастер-класс-влак лийыт. А «Мастарлык ола» манме верыште Удмуртийын тӱрлӧ районласе ремесла пӧртшӧ ден декоративно-прикладной искусство рӱдер-влакын пашашт ончыкталтеш. Йӱла почеш уна-влак ден верысе калык кечывал кочкышым пырля ыштат да марий сем почеш мурен-куштен пайремым эртараш шонат.