18-20 майыште Марий кундемыш Российысе Калык-влак ассамблей советын икымше алмаштышыже, РФ Президент пеленысе межнациональный кыл шотышто советын президиум членже, Российысе науко академийысе Этнологий ден антропологий институтын вуйлатышын алмаштышыже Зорин Владимир Юрьевич толын каен.
Толмо амалже – кугыжаныш национальный политикын стратегийже-влакым верлаште шукталтмым пален налаш.

18 майыште эн ончыч Владимир Юрьевич Волгатехыште уна лийын. Тушто уна вузын ректоржо Шебашев Виктор Евгеньевич да Марий Элысе национальный ден конфессиональный шымлыме рӱдерын пашаеҥже-влак дене вашлийын.
Ты кечынак Марий Эл Республикыште кугыжаныш национальный политик шукталтме концепций шотышто правительствын комиссийжын кумдаҥдыме заседанийже эртаралтын. Тушто Зорин Владимир Юрьевич РФ Президент пеленысе межнациональный кыл шотышто советшын палемдыме корныжо, законжо, документше-влак нерген докладым лудын. Тудын палемдымыж почеш, Юл кундемысе федеральный округын кок регионыштыжо – Марий Эл ден Мордовийыште – гына калык-влак коклаште ласка манаш лиеш.
Ты вашлиймаште саде комиссийын еҥже-влак, тӱвыра, образований пашаеҥ ден журналист-влак, Оньыжа Александров Эдуард Васильевич, оналмаш Мочаев Валерий Александрович, Мер Каҥашын еҥже-влак Матвеев Михаил Иванович, Пушкина Наталья Васильевна лийыныт.
А республикыште национальный политик дене кылдалтше пашам виктарыме шотышто йодыш дене Волгатехын доцентше, историй науко кандидат Сутырина Ольга Николаевна, Марий Эл Республикысе тӱвыра, печать да калык-влакын пашашт шотышто министерствын тӱҥ специалист-экспертше Чемышев Михаил Валерьевич палдареныт. Дмитриев Алексей Евгеньевич Марий кундемыште миграций ситуацийым рашемден.
19-20 майыште Зорин Владимир Юрьевич Курыкмарий ден Звенигово районлашке миен коштын.