27 январьыште Мер-политик рӱдерыште (Йошкар-Ола) Мер Каҥаш вуйверын погынымашыже эртен. Ик эн тӱҥ йодыш-влак: 2014 ийлан Мер Каҥашын паша кышкарже да Россий кӱкшытан VI марий самырыктукым слёт нерген.

Тений ыштышаш паша молгунамсе семынак кӱжгӧ. Паша планым сайтыште варарак ужын кертыда. А Мер Каҥаш вуйверын еҥже-влак тӱҥ шотышто лишыл жапыште илышыш шыҥдараш кӱлмӧ сомыл нерген ойленыт. Теве пургыж (февраль) тӱҥалтыште посна еҥ-влак ялысе школлашке лекташ шонат. Тушто марий йылмым кузе туныктымо шотышто сӱретым ончалын, посна иктешлымашым ыштынешт.

Кузе пытартыш Марий форумышто палемдыме ыле, вес тыгай сессийым регионлаште илыше марий-влакын йодышыштым ончаш пӧлеклаш. Чынже денак, тений Мер Каҥашын шошо сессийже лач тӱрлӧ вере илыше марий калык нерген лиеш. Тыгодым вуйвер погынымаште теве мом ойлышт: шошо вашлиймаш деч ончыч, иктаж пургыж тылзыште, Мер Каҥаш верысе тӱвыра министерствын полшымыж дене ты йодыш денак посна семинарым эртарышаш.
Тыгак икымше кварталыште Мари-Турек районысо Мер Каҥаш шке пашаж дене рӱдӧ вуйверым, вуйлатышым палдара.

Марий самырыктукым слёт шотышто: таче кечылан тудым эртараш районым кычалыт. Кучылтшаш шийвундын икмыняр ужашым Марий Элысе тӱвыра, печать да калык-влак паша шотышто министерстве ойыраш ямде.

Погынымаште тыгай уветарымаш лие: 11 февральыште Йошкар-Оласе марий-влак вашлийыт. Нуно виктарыме мер пашашт нерген ойлаш тӱҥалыт.

Автор: Эльвира Куклина.