2017 ий пеледыш / июнь тылзын 3-шо кечынже Свердловск областьыште марий калыкын «Ага-Пайрем» фестивальже Ачит район Марий Карший ялыште эртаралтеш.

Тушто тӱрлӧ жанр дене пашам ыштыше марий коллектив, посна мурызо, творческий еш-влак участвоватлен кертыт. Чот шотыштат нимогай чарак уке.

Фестиваль тыгай номинацийла дене эрта: «Муро», «Куштымаш», «Семӱзгар дене шоктымаш», «Кидмастар-влакын олашт». Мурышо ансамбль ден солист-влак калык да эстраде мурым мурат. Куштышо-влак ик але кок номерым кондат. Семӱзгар дене шоктышо-влак ик але кок произведенийым ончыктен кертыт.

Марий калык илыме кажне районышто (Ачит, Арти, Красноуфимск, Нижнесергий) ял але ял шотан илем-влаклан «Марий кудо» конкурсышто таҥасаш темлалтеш. Моло-влакланат тышке ушнаш йӧн уло. Кудо-влакым аклыме годым теве мом ончат:

— марий вургемын поянлыкшым ончыктен моштымашым,

— кидмастар-влакын да калык творчестве мастар-влакын паша выставкыштым,

— кидпаша шотышто (тӱр, сӧрастарыме арверым ыштыме, корзиҥгам пидмаш да тулеч моло) мастер-классым эртарымашым,

— марий кочкышым авызлымашым,

— кудо воктене тӱрлӧ сомылым шуктымашым (концерт программым, йӱлам, модышым, конкурсым, аттракционым эртарымашым).

Пайрем годым эн сай кудо-влакым ойырат да диплом ден шергакан пӧлекым кучыктат. Тылеч посна спорт таҥасымаш ден имне дене ӱчашымаш лийыт.

Ага-Пайрем — Урал кундемысе марий-влакын вучымо да жаплыме пайремышт. Сандене кажне гана тышке тӱрлӧ вер гыч ятыр унам вучат. Теният тушко мияш Марий Эл гыч мурызо-влак кумылым ончыктеныт.