Шергакан марий калыкем!

Марий Талешке кече дене алал кумылын саламлем.

Кумда тӱняште илыше марий-влак 26 вӱдшорын Марий Талешке кечым палемдат. Тиде кече — Талешкына-влаклан вуйым савыме кече. Тауштена ме нуным чолгалыкыштлан, патырлыкыштлан, вий-куатыштлан.

Нунылан кӧра ме, марий-влак, калык семын аралалт кодынна да ош тӱняште шкенан нерген яндар йӱкын ойлена. Ойлена шке шыма, йымыжа марий йылмына дене, ошкыл колтена, ласка южым налын, шке мландыштына. Келшена воктен улшо пошкудо калык дене. Палдарена нуным мемнан йӱлана да тӱвырана дене, жаплена нунын калык поянлыкыштым.

Уло чон дене, Юмо деч йодына тӱнялан тыныслыкым да ласкалыкым, марий калыклан вий-куатым. Тек кажне еш тичмаш лиеш, тек кажне чонышто порылык, пиал да тазалык озалана. Лач тыге марий пашана ончык кая.

Ӱмаште коронавирус черым ончыде, ме, марий калык, 11-ше Марий калык Погыным эртарышна. Лекше йодышна-влаклан вашмутым муаш тыршышна, да кӱлешан сомыл-влакым палемдышна. Ончылно мемнам чока паша вуча.

Ӱжам теният Талешке кечым декаде семын 9 ага марте чолган эртараш да 29 вӱдшорын Российысе Сеҥымаш диктантыш ушнаш.
Изи але кугу сомыл, пашам пырля ыштыза. Изи вӱд кугу эҥерыш ушна, изи паша кугу пашаш савырна. Пырляште ме нугыдемына, пырляште ме вияҥына, пырля ме, рыҥ тошкалын, ончыко каен кертына.

Талешке кече дене, марий калыкем!

Марий Оньыжа
Александров Эдуард Васильевич

Йошкар-Ола, 2021 ий, 26 вӱдшор