Пеледыш тылзын икымше кечылаштыже Пошкырт кундем марий тӱвыра рӱдерыш савырнен ыле. Башкортостан правительствын посна пунчалже дене келшышын, республикыште икымше Марий погынлан 100 ий теммылан пӧлеклалтше пайрем кече-влак эртеныт.

                

ПОШКЫРТ мландыште Марий тӱвыра кечым 31 майыште Нефтекамскыште «Марий Эл» кугыжаныш ансамбльын кугу концертше дене почыныт. Эрлашыжым Пӱрӧ (Бирск) оласе краеведений тоштерыште Йошкар-Ола гыч Т.Евсеев лӱмеш тоштерын пашаеҥже-влакын чумырымо ончер шке пашажым тӱҥалын. Нуно марий-влакын Юл гыч Урал марте эртыме корнышт дене палдареныт.

1 июньышто марий калык Пӱрӧ олаш чумырген. 100 ий ончычсылак, ик шонымаш дене: марий илышнам вияҥдыме шотышто каҥашаш. Башкир кугыжаныш университетын Бирскысе филиалыштыже «Марий калыкын этнокультурный ойыртемжым ыштымаште тӱвыран да образованийын полшымыжо: историй могырым ончалмаште» регион-влак кокласе шанче-практик конференций почылтын. Икымше погын эртыме полатыштак.

Шанче форумышто Пошкырт вел гыч 132, Марий Эл гыч 103, тыгак Пермь да моло кундем гыч делегат-влак лийыныт. Пайремым почмо годым Марий Эл правительстве вуйлатышын икымше алмаштышыже, тӱвыра, печать да калык-влакын пашашт шотышто министр Васютин Михаил Зиновьевич, Башкортостан Республик вуйлатышын администраций вуйлатышыжын алмаштышыже Михайлов Максим Владимирович, Кугыжаныш Думышто Башкортостан Республик деч депутат Рахматуллина Зугура Ягануровна, марий Оньыжа Александров Эдуард Васильевич да молат пайрем погынымашын шерге улмыжым, шке калык верч тыршыме пашан акшым, тӱрлӧ калык илыман кундемыште икте-весе кокласе келшымаш кылын кӱлешлыкшым палемден коденыт.

Пленарный заседаний деч вара кум секцийыште посна теме дене каҥашымаш лийын. Кокымшо кечын марий шӱлыш Пошкырт кундемысе Калтаса селаште озаланен. Тыште «Ший кандыра» фестиваль-конкурс эртен. Пошкырт кундем да Марий Эл гыч мийыше фольклор ансамбль-влак шке мастарлыкыштым ончыктен, икте-весе коклаштышт таҥасеныт. Сеҥыше-влакым жюри ойырен. «Ший кандыра» фестиваль икымше гана 2011 ийыште эртен, эрвелмарий кандырам пунен куштымо ойыртемым ончыктен, утыр-утыр вияҥеш.

Тений фестиваль визымше гана эртен да 500 утла участникым, 1000 утла уна-влакым иквереш чумырен. Тышке Пошкырт кундемын Янаул, Краснокам, Калтаса, Краснокам, Балтач, Шаран, Мишкан, Караидель да Нуриман районлаж, Татарстан, Удмуртий да Марий Эл Республикыла, Санкт-Петербург гыч фольклор коллектив-влак лийыныт. Эн мӱндыр участник-шамыч Финляндий гыч толыныт. Тугеже, ойлат организатор-влак, тенийысе «Ший кандыра» фестивальым тӱнямбал кӱкшытан манаш лиеш.

Пошкырт кундемыште Марий тӱвыра кече-влак пайрем тидын дене мучашлалтын огыл. Марий Эл гыч мийыше уна-влак Калтаса, Мишкан, Краснокам, Дӧртыльӧ районлаште верысе калык дене вашлийыныт, фольклор коллектив-влак концертым ончыктеныт. Гран-прим Калтаса район Шоръял гыч «Яндар» фольклор ансамбль сеҥен налын.

«Ший кандыра» фестиваль-конкурс йӱла почеш кандырам тӱшкан куштымо дене пытен.