24 мартыште “Морко мланде” райгазетын тӱҥ редакторжо Петров Валериян Васильевич (1952-2014) ила гын, 65 ияш лӱмгечыжым палемда ыле.

Петров Валериан Васильевич 1952 ийыште Морко район Семисола ялыште шочын. Йоча годсек фотографироватлаш йӧратен. Эсогыл армийыште Байконурышто служитлымыж годым ты сомылым шукташ жапым да йӧным муын. А космический корабльым терген ончымо татым войзен налмыже элнан рӱдӧ газетлаштыже верым муын, туштыжо «Фото ТАСС» манын сералтеныт улмаш.

Уста фотографын пӱтынь илышыже “Морко мланде” газет дене чак кылдалтын. Редакцийыште 42 ий пашам ыштен. Валериян Васильевич фотоаппарат да блокнотшо дене районысо ик предприятийымат, колхоз ден совхозымат, школ ден йочасадымат, ял ден селамат ӧрдыжеш коден огыл. Тудо кажне снимкын, газетыште савыктыме кажне шомакын кӱлешлыкшым умылен. Арам огыл тудым йолташыже-влак «Фото Петров» манын лӱмденыт. Марий Эл Республикын сулло журналистше, чолга мер пашаеҥ, Мер Каҥашын еҥже.