Вӱдкайык, Мери да Раисия Сунгурова

Раисия Сунгурова XI Марий калык Погын годым. Фото Д.Речкинын

17 шыжан Эстонийыште, Тарту олаште кугу концерт эртен. Тушто увер йоҥген: «Вӱдкайык калыкын Леннарт Мери лӱмеш фондын стипендийже марий самырык ӱдырамаш Сунгурова Раисия Борисовналан кучыкталтеш!» Тидыжым Параньга районысо Олор ӱдыр сылнымут пашаж дене сулен налын. Шоялӱмжӧ – Наюк. 2016 ийыште тудо Марий Элысе Олык Ипай лӱмеш кугыжаныш премийын лауреатше лийын.

Эстонийыште тудо ынде кумшо гана палемдалтеш (2016, 2017).

Кызыт шке ешыже дене Сургут олаште ила (Югра кундем). Тыштат чолгалыкым ончыкта, «Марий ушем» йыр чолга-влакым иктеш чумырен, регионысо погынымашым эртарен. Тений 11-ше Марий калык Погынышто Мер Каҥашыш сайлалтын.

Кертеш Олор ӱдыр – Юграсе шӱдыр!