Шорыкйол тылзын 31-ше кечынже Мер-политик рӱдерыште Мер Каҥаш Вуйверын черетан погынымашыже эртаралтын. Вуйверын еҥже деч посна вашлиймашке Марий шанче шымлыше институтын вуйлатышыже Е.П. Кузьминым, «Кугарня» газетын тӱҥ редакторжо Э.А. Иманаевым, Мер Каҥашын еҥже И.В. Алтаевам ӱжмӧ ыле. Ты гана тыгай йодыш-влакым каҥашыме:

  1. Марий форумын шошо сессийым ямдылыме да эртарыме нерген.
  2. Марий Элысе корно указательлаште села, ялла да эҥерла лӱм-влакым йоҥылыш возымо нерген.
  3. 2019 ийлан да 2019 ийын икымше кварталлан Марий Мер Каҥашын паша планже.
  4. Марий Эл Республикысе Виктерыш марий калыкын XI-ше Погынжылан ямдылалтме нерген серышым возымаш.
  5. Тӱрлӧ.

Икымше йодыш дене оналмаш В.А. Мочаев палдарыш. Марий Форумын шошо сессийжым вӱдшор тылзын 26 да 27 кечылаштыже эртараш темлыш. Икымше кечын – «Марий Элысе олалаште да райрӱдылаште марий калыкын шкешотан улмыжым арален кодымаш» конференций, эрлашыжым – Марий Мер Каҥашын VIII-ше Пленумжо. Валерий Александровичын мутшо почеш, Пленумышто тыгай йодыш-влакым лончылыман: Марий Элын 100 ияш лӱмгечыже вашеш мероприятийым ямдылыме да эртарыме нерген; марий калыкын XI-ше Погынлан ямдылалтмаш. Е.П. Кузьмин вӱдшор тылзыште шанче шымлыше институтышто конференцийым эртараш ямдылалтме нерген каласкалыш. Л.И. Кошкина Марий тӱвыра рӱдерын Талешке кече вашеш ямдылалтше мероприятийла дене палдарыш. Чыла ойым колыштмеке, тыгай пунчалым лукмо: Марий Мер Каҥаш шанче шымлыше институт да тӱвыра рӱдер дене пырля кугу программым ямдылаш пижеш.

Кокымшо йодыш дене Оньыжа Э.В. Александров палдарыш. Марий Элысе корно указательлаште села, ялла да эҥерла лӱм-влакым йоҥылыш возымо нерген серыш-влакым районысо вуйлатыше-влаклан колтымо ыле.

Эдуард Васильевичын мутшо почеш, чыла глава-влак вашмутым колтен огытыл. А колтышо-влак кокла гыч лийыныт тыгай, кудышт нӧлталме проблемым огыт уж. М.З.Васютин ты йодышым лончылымо годым Курыкмарий районын пашажым пример шотеш ончалаш темлыш. Тушто указатель-влакым веле огыл чын возымо, тыгак верысе историй дене пале-влак улыт. В.А. Мочаев Марий Элысе Мер Каҥашын еҥже-влаклан верлаште тиде йодышым шке кидыш налаш темлен да шыже сессийште эртарыме паша нерген отчётым ямдылаш йодын.

2019 ийлан да 2019 ийын икымше кварталлан Марий Мер Каҥашын паша планже дене Оньыжа палдарыш. Паша молгунамсе семынак ятыр: кок Марий форумым да кажне тылзын тӱрлӧ районлаште Вуйверын погынымаш-влакым эртарымаш, марий калыкын тӱҥ пайрем-влакым (Талешке кече, Пеледыш пайрем, Тиште кече) да Унчо кундемыште 11-ше Марий самырыктукым слётым ямдылымашке ушнымаш, да тулеч молат. Тыгак Эдуард Васильевич посна план дене Марий Элын 100 ияш лӱмгечыжлан ямдылалтме нерген увертарен. Варажым оналмаш А.Я. Гайсин – Пошкырт мландысе марий-влакын, вуйверын еҥже Л.И. Мусихина – Свердловск кундемысе марий-влакын паша план дене палдареныт.

Нылымше йодыш деке куснымо. Э.В. Александров ушештарыш, XI-ше погын марте ик ий наре кодын. Тудын деке кызытак ямдылалташ тӱҥалман. Марий Эл Республикысе Виктерыш марий калыкын XI-ше Погынжылан ямдылалтме нерген серышым возыман. Паша группым чумырыман. Марий форумын шошо сессийыштыже информаций дене палдарыман. Тиде темлымаш дене погынышо-влак келшышт.

Тӱрлӧ йодышым лочылымо годым, мутым Вуйверын еҥже Л.Г. Иксанова нале. Тудо марий йылме дене учебник-влак нерген йодышым тарватыш. Кузе Марий Эл деч ӧрдыжсӧ изи школлан учебникым муаш? Тиде йодышлан М.З. Васютин вашештыш. Михаил Зиновьевичын мутшо почеш, Марий Эл деч ӧрдыжсӧ изи школ-влаклан Республикынан Виктерже полшен кертеш. Йодмашан серышым гына возыман да палемдыман – могай класслан мыняр экземпляр кӱлеш. Тыгак изи школлаште кадровый проблеме шогымо нерген йодыш нӧлталалте. Марий йылмым тунемаш кумылан-влак улыт, а туныктышо уке. Кузе лийман? М.З. Васютин каласыш, марий филолог арнялан кок шагатым вӱдаш школыш огеш кае. Но вет тыгай школлаште вес предметым вӱдышӧ туныктышо-влак ыштат. Нунын кокла гыч марий йылмым палыше-влакат улыт. Молан нунылан марий йылме туныктышо допподготовкым эрташ да тиде кок шагатым налаш огыл? Республикына тыгай специалистым ямдылаш полшен кертеш. Йодмаш гына пуршаш.

Вуйверын погынымашыже Мер Каҥашын юбилярже-влакым саламлымаш дене мучашлалте.

Анатолий Титовын фото-влак.