18 апрельыште Мер Каҥашын Моркысо пӧлкаже «Йыргешке ӱстел» йыр погынен. Тушто ял илыш, шочмо йылмынам да тӱвыранам аралыме, вияҥдыме, марий калык модыш, Марий Талешке кечым палемдыме нерген каҥашыме. Мучашлан чолга мер пашаеҥ-влак тыгайрак иктешлымашым ыштеныт:

— Ончыкылыкна — шкенан пашаште;

— Икшывын шочмо йылмым пагалымыже ача-аван шочмо йылмым йӧратымыже гыч тӱҥалеш: кузе ача-ава-влак икшывыштым туныктат, нуно туге кутыраш тӱҥалыт. Изи ньога руаш гай, тудым кузе шонет, туге «нӧштылаш», мом шонет, тудым «кӱктен» лукташ лиеш;

— Школлаште шочмо марий йылмылан тӱткышым ойырымым директор тичмашнек рашемден кертеш: туныктымо программым тудо шке кидпалыж дене пеҥгыдемда. Школлаште икте, але икмыняр икшыве марла кутырен огыт мошто гын, нуным кыртмен туныктыман. Тунам марий икшыве шочмо йылмыжым пагалаш да аклаш тӱҥалеш. Тидыже директорын марий койышыжо, марий шӱлышыжӧ могай улмо дене кылдалтын;

— Кугезе коча-кованан модышыштым калык, поснак йоча-влак коклаште, шарыман;

— 23 апрельыште Моркысо 1-ше, 2-шо, 6-шо №-ан, Унчо школлаште, Коркатово лицейыште, Морко тӱвыра рӱдерыште (2-шо кабинет) «Тиде Морко, мыйынат шочмо вер!» район кӱкшытан этнографический диктантым эртараш. Тудым возаш тӱҥалме жап — 11 шагатат 30 минут;

— 26 апрельыште, Марий Талешке кечын, 8 шагат эрдене Морко тӱвыра рӱдер ончылно, Сергей Григорьевич Чавайнын памятникше воктене, талешкына-влакым шарналтен, Шарнымаш сортам чӱкташ.

Пагалыме марий калык, чыландамат ты пашашке пырля ушнаш ӱжына.

Анатолий ТИТОВ,

Мер Каҥашын еҥже.

Снимкылаште: Морко районысо Мер Каҥашын активше йодыш-влакым каҥаша.