2017 ий сӱрем тылзын икымше кечынже Пермь кундем Октябрьский район Тляково ялыште Пеледыш пайрем эртен.

Урем-влак дене пайрем колонно ошкыл эртен. Тыгодым ялыште илыше кажне сурт гыч оза-шамыч национальный кочкышышт дене вашлияш лектыныт. Варажым тудым кужу ӱстембалышке шынденыт. Пайрем эртарыме верыште капкам ыштыме. Тушто кажне еҥым марий вургеман ӱдырамаш-влак – Апонасова Екатерина Леонидовна, Москина Ольга Алексеевна да Никифорова Елена Александровна – кинде-шинчал, пура да моло сий дене вашлийыныт, тыгодым, сылне шомак ден мыскарам марла ойленыт, кумылым нӧлтеныт.

Пайремым Руш Сарс ял шотан илемым вуйлатыше Седухин Владимир Александрович, Октябрьский район вуйлатышын алмаштышыже Ерохина Елена Анатольевна да Пермь оласе марий тӱвыра рӱдерым вуйлатыше Попова Раиса Шамратовна торжественно почыныт.

Пеледыш пайрем – тиде шошо агам да ик идалыкаш сомылым иктешлыме кече. Эн ончычак Тляково ялын эн кугу ийготан еҥжылан – Тляково ялыште илыше Апонасова Акулина Николаевналан – пӧлекым кучыктеныт.

Кидмастар Апонасов Владислав Борисовичымат ик эн уста еҥ семын саламленыт. Тудо пӱкеным, креслым, кроватьым да молымат шке кидше дене ыштен. Ялысе калык арверымат ышташ тудлан эҥерта. Пайремыште тудын пашаже-влакым ончыктымо.

А ӱдырамаш-влак коклаште кидмастар Усикова Елена Михайловнам палемденыт. Тудын пӧрткӧргыжӧ моторлык тоштерла веле коеш. Салфеткым, кӱпчквалым, покрывалым, моло настамат – чыла крючок дене пидме. Мастарлык да пашам йӧратымаш Елена Михайловнам курчак-влакым чиктен шогалташ полшеныт.

Эше майыштак Тляково ялыште «Эн сай сад-пакча» конкурсым увертарыме улмаш. Икымше верыш сӧрал пеледышан пакчаж дене Усикова Елена Михайловна лектын. Тыгак ойыртемалтше радамыште Акушева Оксана Павловна ден Антонина Дмитриевна Иванован ончен куштымо пеледышышт улыт.

Пайремыште пӧръеҥ-влаклан ятыр таҥасымаш лийын. Меҥге вуйыш кӱзымаште Москин Олег Фёдорович ойыртемалтын. Вӱд ӱмбалне пырня дене коштмаште Тайкиев Константин Александрович ден Москина Надежда Николаевна сеҥеныт.

Тӱвыра программат тӱвыргӧ лийын. Тляково ялын «Новое поколение» ансамбльже «Кечыйол» муро дене куандарен. Тыгак йоча-влак вальсым куштымышт дене сценыште моторын койыныт. Кугыеҥ-влакын «Марий памаш» ансамбльыштат шке мастарлыкшым ончыктен. Нине кок ансамбль-влакым Апонасова Екатерина Леонидовна вуйлата. Тыгак верысе «Кумыл» ансамбль (вуйлатышыже — Гафарова Вера Афанасьевна), Пермь гыч «Памаш» (вуйлатышыже – Романов Олег Александрович), Суксун район гыч «Эр ӱжара» (вуйлатышыже – Спиридонова Надежда Савватеевна), Октябрьский посёлко гыч «Раздолье» ансамбль-влак сценыште мурен-куштеныт.

Йоча, самырык-шамычлан посна площадке-влак пашам ыштеныт. Тыгак кидпашалан туныктышо «Уста кид» лук лийын. Тушто марий мастар-влак шке пашаштым ужаленыт. Тыгак мастар ӱдырамаш-влак курчакым ышташ, салфетке гыч пеледышым ышташ да шарфикым ургаш туныктеныт.

Пеледыш пайрем вашеш Тляково ялыште илыше-влак шке кӱшешышт яллан стелым ыштеныт. Тудым Апонасов Владислав Борисовияч ден Талетов Олег Данилович пу гыч ямдыленыт.

Каласен кодыман – Тляково ялыште чот (перепись) почеш 163 марий ила, кум урем, 67 пӧрт улыт.

Попова Р.Ш.,

Мер Каҥашын еҥже.