2017 ий сӱрем кечын 8-ше кечынже слётын участникше-влак X тÿнямбал «Кугезе мланде» фестивальыште лийыныт.

Тиде фестивальыш тÿрлö регионла гыч ушненыт: Киров, Угарман (Нижегородский), Татарстан кундем, Донецк калык республике, да мутат уке, Марий Элын тÿрлö районлаж гыч. Эн ончычак мутым Марий Эл вуйлатышын пашажым жаплан шуктышо Александр Александрович Евстифеевлан пуэныт. Тудым йÿла почеш кинде-шинчал дене вашлийыныт. Вуйлатышына ойлен: «Марий Эл — шке тӱвыраж, йӱлаж дене ойыртемалтше республик. Таче мемнан кугезына-влакын кидпашаштым, ыштыш-кучышыштым ончалына кертына. Вет тудым тукым гыч тукымыш арален коденыт». Тыгак уна-влаклан Александр Александрович сай кумыл ден кугу сеҥымашым тыланен коден.

Килемар районым вуйлатышыже Людмила Арсентьевна Толмачева погынышо-влакым «Кугезе мланде» фестиваль дене саламлыш да организатор-влаклан таумутым каласен кодыш.

Кече мучко тÿрлö площадке-влак пашам ыштеныт: кÿслем шоктеныт, шун кöршöкым ышташ туныктеныт, шудым савыркаленыт, мелнам кÿэштмаш. Тыгак марий калыкын кудыжым ончалаш лийын. Тыге ме калыкын ожнысо илышыштым ончалын кертынна. Марий самырыктукымын IX слётын енже-влак Икымше марий погынлан пöлеклалште инсценировкым ончыктеныт. Тылеч посна шуко кидмастар-влак шке пашаштым ужалаш луктыныт: тувырым, шергашым, шовыч-влакым, пылышкöржым, шÿэшпидышым да молымат. Тиде жапыштак сценыште тÿрлӧ регионла гыч толшо уна-влак шке мастарлыкыштым ончыктеныт да таумут дене палемдалтыныт. Концертыш слётчик-влакат уло кумылын ушнышт. Фестиваль келшымаш тулото дене мучашлалте.

«Раздолье» турбазыште «Ял илышым вияҥдымаш» йыргешке ÿстел эртыш. Тушко А.А. Евстифеев толын, участник-влакым пайрем дене саламлыш, пашам кыртмен ышташ да тÿвыргö лектышым тыланыш. Умбакыже йодышлан вашмутым тÿвыра, печать да калык паша шотышто министр Михаил Зиновьевич Васютин ден ВРИО-н советникше Андрей Петрович Кравец пуэныт. Слётын участникше-влак тургыжландарыше йодышым пуэныт, мутлан: молан марий йылме урок школлаште шагал эртаралтеш, самырык-влаклан паша вер укелан кöра ялым коден каят – кузе нуным пöртылташ да молат.

Варажым ÿдыр-рвезе-влак проект дене кыртмен пашам ыштеныт. Ныл лужаште шуко шонымаш шочын, кажныже шкешотан. Ӱшанен кодына, эрла, 9 июльышто, участник-влак шке проектыштым кугу кÿкшытыштö аралат.

Аня ден Вероника.