2017 ий 16 июньышто Марий Эл Республикын сулло художникше Боголюбов Валерий Алексеевич илыш гыч каен.

Боголюбов Валерий Алексеевич Морко район Ильинский почиҥгаште 1954 ий 4 январьыште шочын. Чебоксарысе художественный училищым (1973), И.Е.Репин лӱмеш живопись, скульптур да архитектур институтым (1982) тунем лектын. 1982 ий годсек Йошкар-Оласе художественный училищыште «Рисунок», «Живопись», «Композиций» предметла дене туныктен. Россий художник ушемын еҥже (1993). 2001-2005 ийлаште Россий художник ушемын Марий Элысе пӧлкажым вуйлатен.

Валерий Алексеевич Марий Эл Республикыште кӱшыл квалификациян специалист-влакым ямдылен. Тудо Поволжский кугыжаныш технологический университетын Чоҥымаш ден архитектур институтыштыжо 10 ий утла пашам ыштен, полат-влакым проектироватлыме кафедрыште творческий дисциплин-влакым туныктен.

Сӱретчын пашаже-влак моло деч ойыртемалтыт: тудо коомпозицийын тӱрлӧ ужашыжым иктыш огеш ушо, шарнаш кодшо картиным возен. Кажне радынаштыже «пушеҥгын вожшо» шижалтын, кеч тиде ялысе пейзаж але ӱдырамашын сӱретше лийын. Чылаштыжат «Кава —  мланде» симметрий ончыкталтын. Финн-угор калыкын мифологийжым почын пуэн, тыште тӱсым кучылт моштымыж нерген ойыртемалтын. 60 ияш лӱмгечыжлан Йошкар-Оласе изосымыктыш тоштерыште 100 утла живопись ден графикшым ончыктымо персональный выставкым чумырен ыле.

Аку.