26 октябрьыште Мер Каҥаш вуйверын черетан погынымашыже эртаралтын.

Тушто икмыняр йодышым ончымо.

Икымше йодыш Марий форумым ямдылыме шотышто лийын. Вуйвер пунчалын: Марий форумын шыже сессийжым 2017 ийын кылме (ноябрь) тылзын 25 кечыштыже У Торъял районышто эртараш пунчалын.

Кокымшо йодыш. 1 ноябрьыште В. М. Васильев лӱмеш Марий шымлыше институтышто (Йошкар-Ола, Красноармейский урем, 44-ше №-ан пӧрт) «Марийская общественная мысль в контексте современности» «йыргешке ӱстел» лийшаш. Тыште марий калыкын ончыкылыкшо нерген мутланымаш лиеш. Ты «йыргешке ӱстелыште» каҥашышаш йодыш ден теме-влакым Мер Каҥаш вуйверын еҥже-влакланат темлыме. Икмынярже шке выступленийыштым ямдыленыт. «Йыргешке ӱстелыш» Мер Каҥаш лӱм дене кок еҥым колташ палемдыме: Оньыжа Александров Эдуард Васильевичым да икымше оналмаш Мочаев Валерий Александровичым.

Кумшо йодыш дене Мер Каҥашын еҥже Пушкина Наталья Васильевна выступатлен. Тудо Марий Элын шочмо кечыжым палемдыме нерген каласкален. Мер Каҥашын еҥже-влаклан республикын шочмо кечыжым пайремлымашке ушнаш пунчалме.

Моло йодыш-влак:

Мер Каҥаш вуйверын составшым вашталтыме шотышто йодышым (ротаций) шушаш пленумышто лончылаш палемдыме.

Марий тиште кече, 10 декабоь, тений рушарнялан шотлан толеш гынат, ты кечынак эртараш кутырен келшыме.