Пагалыме ÿдырамаш-влак!

Марий Эл Кугыжаныш Погын да Марий Мер Каҥаш лÿм дене уло кумылын чыладамат Ӱдырамаш-влакын тÿнямбал кечышт дене саламлем!

Курымла вошт кажне ÿдырамаш еш тулотым переген, икшывым ончен, нунын пиалышт верч тыршен. Кызытат те пÿтынь тÿнялан пеҥгыде кöргö вийым, чытымашым ончыктеда да айдеме тукымын ик эн мотор да ушан-шотан радамже лийын кодыда. Шкендан пашаче койышда да лишыл еҥланда кеч-кунамат полыш кидым шуялташ ямде улмыда дене те пöръеҥ-влакым утыр талырак лияш таратеда. Шочмо марий йылмынам, тÿвыра поянлыкнам да кугезе йÿланам арален кодымаште те эре ончыл верыште улыда. Тендан шокшо шÿм-чонда марий калыкланна илаш да вияҥаш полша. Тау тыланда, пагалыме ÿдырамаш-влак!

Тиде волгыдо пайрем пÿртÿс помыжалтме пагытыште толеш да кажне пöръеҥын чоныштыжо ныжылгылыкым, йöратымашым да илышлан куаныме кумылым шочыкта. Сандене тачысе 8 Март кечын кажне ÿдырамашлан пеҥгыде тазалыкым, кужу ÿмырым да волгыдо йöратымашым тыланем. Тек уло тÿня тендам пагала да йöрата, а икшывыда-влак таза да пиалан кушкыт.
Пайрем дене!

Марий Эл Кугыжаныш Погын вуйлатышын алмаштышыже,
Марий Оньыжа Анатолий Иванов.