Кугу Отечественный сарыште фашизмым сеҥымылан тений
9 майыште 69 ий темеш гынат, калык чонышто тиде кече кызытат ила, чоныштына куан ден ойгым ылыжта.

Тиде Кугу Сеҥымаш верч чумыр калык чот кыртмен кучедалын. Тудым лишемдымашке пÿтынь Совет Ушем дене пырля марий калыкат шке надыржым пыштен. Марий кундем гыч 56 тÿжем еҥ тулан сöй пасушто курымешлан кодын. Ме нунын ончылно нигунам тÿлен пытарыдыме парымыште улына.

Поро йÿла почеш 9 майыште пÿтынь калык, Кугу Отечественный сарыште шке вуйыштым пыштыше шочшыжо-влакым шарналтен, вуйым сава да тыныс верч тавадаҥ шогаш мутым пуа.

Ме моло дене пырля марий герой-фронтовик-влакын лÿддымылыкыштым, чолгалыкыштым да патырлыкыштым, тылыште кодшо ача-авана ден коча-кована-влакын кöргö вий-куатыштым, шкеныштын тазалыкыштым чаманыде, йÿдшö-кечыже завод ден фабрикылаште, пасу ден чодыраште тыршымыштым эре шарнена да чоныштына ашнена. Нунын подвигышт негызеш кызытсе самырык тукымым патриотизм шÿлышаным, пеҥгыде койыш-шоктышаным да Шочмо элнам йöратыше кумыланым шуараш тыршена.

Пагалыме ветеран-фронтовик ден тылыште Сеҥымашым лишемдаш полшышо пашаче-влак, нунын шочшышт да уныкашт!

Таче мый чыландамат Мер Каҥаш лӱм дене алал кумылын Кугу Сеҥымаш пайрем дене саламлем. Чылаландат тынысле яндар кавам, пеҥгыде тазалыкым, кужу ӱмырым, вашла пагалымашым да пиалым тыланем.

Пайрем дене!

Марий Оньыжа А.Н.Иванов.