Тачысе илышыште тÿшка уверым шаркалымаш кугу тÿткылыкым, рашлыкым, пеҥгыде да тыматле койышым йодеш. Тыгодым тиде уверым калык деке чын намиен шуктыман. Марий савыктыш-влак коклаште «Ончыко» журнал кугу верым айла. Тудын тÿҥ шонымашыже – кызытсе сылнымут дене палдараш, мер-политике илышым радамлен ончыкташ. Тыште ме сылнымут дене кылдалтше тÿрлö шымлымаш дене палыме лийын кертына. Марий шымлызе, искусствовед, критик-влакын статьяштым, писатель-влакын поэтический, прозаический да драматический произведенийыштым лудына.

Чыла тиде моткоч кÿлешан. Те, «Ончыко» журналын пашаеҥже-влак, марий йылмым, тÿвырам аралымаште сай пашам шуктен шогеда. Ӱшаныме шуэш, тыгай суапле пашада эшеат вияҥеш. Вет «Ончыко» журналын кумда да историеш келге кышам кодышо 90 ияш эртыме корныжо да волгыдо ончыкылыкшо уло.

Шергакан таҥ-влак, марий журнал умбакыжат тӱзланыже, у деч у сеҥымаш, сай лектыш дене куандарыже. Лудшо-влакат шуко лийышт. Кажне пашаеҥлан тазалыкым, пиалым, шÿм-чон ласкалыкым, усталык кÿкшытым тыланем.

Пайрем дене!

Пагален, Марий Оньыжа Э.В. Александров.