2016 ий ага тылзын 23 да 24 кечылаштыже Йошкар-Олаште «Финн-угор калыкын поянлыкше» III тӱнямбал финн-угор студент форум эртыш. Тушко Германий, Франций, Австрий, Канада да эше Россий Федерацийысе 13 субъект да 22 туныктыш тӧнеж гыч толын коштыч. Тиде форум дене Марий Оньыжа саламлыш.

— Шергакан финн-угор студент, аспирант, самырык шымлызе-влак!
Тӱнямбал финн-угор студент форумын пагалыме унаже-влак!

Марий кундем, Йошкар-Ола, Марий кугыжаныш университет ончыкылык тале шымлызе-влакым тыгай кумда да кугу форумышто кумшо гана вашлийыт. Тиде, чынжымак, историеш кодшо келге кыша, кӱлешан паша. Чыландамат волгыдо пайрем дене уло кумылын саламлем.

«Финн-угор калыкын поянлыкше» III тӱнямбал финн-угор студент форум лектышан лийшаш. Тачысе самырыктукым шке шочмо йылмыж нерген шона, калык тӱвырам, йӱлам арален кодымашке могай-гынат надырым пышта гын, финн-угор калык-влакын эрласе кечыж нерген пеҥгыден ойлен кертына.

Самырык шымлызе-влак, ойырымо корныда пиалан лийже, шуко сеҥымашым кондыжо. Яндар шонымашке эреак шуаш тыланем.

Пайрем дене!

 

Пагален Марий Оньыжа Эдуард Васильевич Александров.