Марий Эл Республикым вуйлатышын 21 мартыште лекше указше почеш Марий тӱвырам вияҥдымашке кугу надырым пыштымыжлан «Марий кундем» семӱзгар кугыжаныш оркестрын артистше Волков Дмитрий Валерьевичым «Марий Эл Республикын сулло артистше» лӱм дене суапландареныт.

Волков Дмитрий Валерьевич 1976 ийыште Мурманск областьыште шочын. 2001 ийыште Москосо кугыжаныш институтым, 2002 ийыште Санкт-Петербургысо тӱвыра да сымыктыш университетым тунем лектын. А 2014 ийыште Генсинмыт лӱмеш Российысе музык академийыште шинчымашым налын да кызыт тыштак преподавательлан пашам ышта, студент-влакым семӱзгар-влак дене шокташ туныкта. «Марий кундем» семӱзгар кугыжаныш оркестрыште 2003 ий годсек шокта. Кажне ийын Дмитрий Валерьевич Марий филармонийын «Марийская осень» фестиваль годым эртыше «Гусляры» музыкальный проектышкыже ушна. Тудын кӱсле дене шоктымо концертшым калык куанен вашлиеш. Марий Элыште артистын концертше-влак кундемнан «шӧртньӧ» фондышкыжо пурталтыныт.