Марий Элыште тӱвырам вияҥдымашке кугу надырым пыштымылан да кужу жап сайын пашам ыштымылан сулло лӱмым налше уста еҥ-влакым саламлена.

2017 ий 3 мартыште Марий Эл Вуйлатышын лекше Указше почеш «Морко районысо клуб системе» тӱвыра тӧнежым вуйлатыше Дмитриев Владимир Аркадьевичым да республикыште «У сем» журналын тӱҥ редакторжо Ягодарова Людмила Петровнам «Марий Эл Республикысе тӱвыран сулло пашаеҥже» почётан лум дене суапландареныт.

Дмитриев Владимир Аркадьевич 1962 ийыште Морко район Мызэҥер/ Мизенер ялыште шочын. 1985 ийыште Марпединститутым тунем лектын. Шочмо велыште школышто туныктышылан, клубышто худруклан да директорлан, 2010 Кугу Шале ял шотан илемым вуйлатышылан пашам ыштен. Марий калыкын Х съездшын делегатше лийын, 2016. 2015 ий февраль годсек «Морко районысо клуб системе» тӱвыра тӧнежым вуйлата. «Морко кундем» ансамбльын композиторжо. Марий Элысе Кугыжаныш премийын лауреатше (2009 ий).

Ягодарова Людмила Петровна 1958 ийыште Курыкмарий район Сарансола/ Сараново ялыште шочын. 1981 ийыште МарГУ-н марий филологий пӧлкажым тунем пытарен. Омскышто «Автоматика» заводышто, Кинофильмым прокатыш пуышо республикысе конторышто, «Ямде лий» газет редакцийыште 24 ий пашам ыштен. Эн ончыч курыкмарий «Ямде лий» газетын корреспондентше да кусарышыже лийын, вара — отдел вуйлатыше, ответственный секретарь. 2014 ий годсек курыкмарла савыкталтше «У сем» журналын тӱҥ редакторжо. Пашан ветеранже. Россий журналист ушемын еҥже.