2017 ий кылме (ноябрь) тылзын 30-шо кечынже Марий Эл Республикым вуйлатыше Евстифеев Александр Александровичын пунчалже почеш, музыкальный искусствым вияҥдымашке да тудым шарен шогымашке кугу надырым пыштымыжлан Кульшетов Валерий Дмитриевичым «За заслуги перед Марий Эл» орденын медальже дене наградитлаш пунчалым луктын.

Тиде наградым Валерий Дмитриевичлан 2017 ий 10 декабрьыште М.Шкетан лӱмеш Марий драмтеатрыште Марий тиште кечым палемдыме годым Марий Эл Правительстве председательын икымше алмаштышыже Васютин Михаил Зиновьевич кучыктыш.

Кульшетов Валерий Дмитриевич 1952 ий 17 октябрьыште Марий Турек селаште шочын. Ачажат Дмитрий Михайлович кундемыштына палыме композитор лийын, 20 тӱжем утла марий калык мурым поген. Валерий Дмитриевич Йошкар-Оласе 14-ше №-ан гимназийым, Йошкар-Оласе музыкальный училищым, Москосо Чайковский лӱмеш консерваторийым тунем пытарен. 1990 ий годсек И.Палантай лӱмеш Тӱвыра да сымыктыш колледжыште туныкта, а 1996 ий годсек «Музыкальное искусство эстрады» пӧлкам вуйлата. Российысе Композитор ушемын Марий Элысе пӧлкажым вуйлата. Олык Ипай лӱмеш кугыжаныш премийын лауреатше, Марий Эл искусствын сулло пашаеҥже (1995), Россий искусствын сулло пашаеҥже (2004) лӱм-влакым сулен.