Волжск районысо Пӧртанур ялысе тӱвыра пӧрт пырдыжыште кумшо шарнымаш оҥам почмо.

Тылеч ончыч тыште тиде ялынак чапланыше эргыже, республикысе кугыжаныш пашаште кужу жап тыршыше, писатель семынат ойыртемалтше Николай Рыбаковлан, поэт Александр Селинлан шарнымаш оҥа лийын гын, 12 июльышто йылмызе, филологий наукын докторжо Леонид Петрович Грузовлан торжественно почмо.

Шанче тӱняште шымлыме пашаж дене келге кышам кодышо айдемым шочмо ялыштыже, Марий Элыште илыше калык гына огыл, уло финн-угор тӱня шарна. Студент-влаклан тудо тыматле туныктышо, самырык-влаклан эреак полшаш тыршыше, поро кумылан лийын. Лекцийым лудмыж годым чӱчкыдынак мыскарам ыштылын, но экзамен але моло тергымаш годым пеҥгыдын йодын моштен. Кажнылан сай шинчымашым пуаш тыршен. «Сандене тудын нерген ушыштына волгыдо шарнымаш гына ила» манын, кугешнен каласышт оҥам почмо годым тунемшыже-влак кокла гыч Волжск районысо Карай школ вуйлатыше Сергеева Любовь Анатольевна, Марий кугыжаныш университетыште пырля пашам ыштыше Глухова Наталья Николаевна ден Абукаева Любовь Алексеевна.

— Юлсер кундемыште илыше-влак тыгай чапланыше шочшынам огына мондо, нунын нерген шарнымаш эреак лийже манын, пашам ончыкыжымат ышташ тӱҥалына, — иктешлен каласышт Волжск районысо депутат-влак погынымашын вуйлатышыже Макаров Анатолий Алексеевич, администраций вуйлатышын социальный йодыш шотышто алмаштышыже Муравьева Эльвира Николаевна.

Л.Грузовын шӱжарже Римма Петровна учёныйын тунемме годсо неле жапшым шинчавӱд йӧре шарналтыш:

— Ешыште тудын дене пырля ме индеш йоча кушкынна. Ленинградыш тунемаш каяшыже окса лийын огыл, мо дене каен, авамат, мыят ом пале, но йӧным муын. Ала тидланак кӧра чот сайын тунемаш тыршен, моло деч кугурак стипендийым налын. Идалык гыч толмекыже мылам мотор гына тувырым налын конден ыле. Поро кумылым ончыктен моштен родо-тукымжыланат, калыкланат.

Шарнымаш оҥа пелен пеледышым пыштымаште Памар да районысо моло ял шотан илем вуйлатыше-влакат, Оньыжа Александров Эдуард Васильевич миеныт ыле. Кугу пашам шукташ полшымылан Л.Грузовын Валерий эргыже, Римма Петровна шӱжарже чылалан, поснак Пӧртанур ял калыклан да окса дене полшышо-влаклан тауштен ойленыт.

Эдуард Иманаев.