Марий Оньыжа Анатолий Иванов «Саскавий» марий ӱдырамаш ушемын Кандамше мартлан пӧлеклалтше касыштыже лийын. Тудо марий ӱдырамаш-влакым пайрем дене саламлен да нунылан шӱм гыч лекше сылне почеламутым пӧлеклен.

«Саскавий» ушемын ты мероприятийже йӱлашке пурен, 2007 ий годсек кажне идалыкыште эрта. Тыгодым кажне гана у шӱлыш дене ойыртемалтеш. Теве тений чолга марий пӧръеҥ-влак ӱдырамаш-влаклан сылне деч сылне почеламут корнылам пӧлекленыт. Я шкеныштын, я поэт-влакын почеламутыштым Марий Оньыжа Анатолий Иванов, Марий Эл Кугыжаныш Погынын пресс-секретарьже Александр Петров, республикысе тӱвыра, печать да калык-влак паша шотышто министерствын ик пӧлкажым вуйлатыше Игорь Садовин, Марий тӱвыра рӱдерым вуйлатыше Валерий Григорьев, поэт Геннай Сабанцев, артист Александр Бирюков лудыныт. Уста музыкант Родион Алексеев гармоньым шокталтен, шке мурыж-влак дене куандарен, молымат мураш да кушташ таратен. Артист Иван Смирноват сылне мурым пӧлеклен.

У Торъял районысо землячествым вуйлатыше Виктор Наумов тиде кечын шочшо композитор Элина Архиповам чылаштын лӱм дене саламлен да посна пӧлекым кучыктен. Март тӱҥалтыштак журналист Антонина Шакирова шочын – тудымат поро мут, пӧлек дене палемденыт.

Пайрем дене чылаштым саламленыт республикысе тӱвыра, печать да калык-влак паша шотышто министрын алмаштышыже Галина Ширяева ден таче «Саскавий» марий ӱдырамаш ушемым вуйлатыше Ираида Степанова. Мурпӧлекым кучыктеныт Татьяна Денисова, Светлана Строганова, Анфиса Эманова, Наташа Пушкина, Марина Почтенева. А мучаште мотор тӱням тыгаяк мотор тюльпан пеледыш дене сӧрастареныт – тудым кажне ӱдырамашлан пӧлекленыт.