Марий Мер Каҥаш лӱм дене тендам у 2015-2016 тунемме ий тӱҥалме дене алал кумылын саламлем!

1 сентябрьыште, Шинчымаш кечын, уло элна мучко чыла школ-шамыч шке омсаштым ӱдыр-рвезе-влаклан угыч почыныт. Кызытсе пагытыште кажне самырык еҥ обществыште шке вержым муаш, кӱлешан еҥ лияш шона, а тидлан моткоч тыршен тунемман. Сандене кажне йочалан волгыдо уш-акылым, чолгалыкым да сай отметкым тыланем!

Мутат уке, тиде пайрем кече туныктышо, тунемше-влакынат да нунын ача-авштынат шÿмыштым вургыжтара. Но илышыштышт икымше гана школыш кайыше икшыве-влак поснак тургыжланат. Вет нунылан палыдыме, тунамак пеш вучымо школ илыш тÿҥалеш. Тугеже тек Шинчымаш кече чыланыштлан волгыдо корным почеш!

Школ пагыт кажне еҥын илышыштыже ик эн оҥай, весела да чытамсыр койышыж дене шарнымашеш кодеш, тыгодымак чолгалыкым да пеҥгыде кöргö вийым йодеш. Вет лач тиде жапыште ончыкылык илышлан негыз пышталтеш. Сандене тыланда, марий ÿдыр-рвезе-влак, у тунемме ийыште чылаландат пеҥгыде тазалыкым, сай шинчымашым, вашла пагалымашым да пиалым тыланем!

Марий Мер Каҥаш лÿм дене эше ик гана чыландамат уло кумылын Шинчымаш кече дене саламлем! Ончыкыжымат шке калыкнам пагалаш, марий тÿвыранам да кугезе йÿланам жаплаш, шочмо йылмынам аклаш да тудын дене вожылде мутланаш ÿжам.

Пайрем дене!

Пагален Марий Оньыжа Анатолий Николаевич Иванов.