2017 ийыште Марий калыкын I погынжым эртарымылан 100 ий темеш. Жапше годым тиде погын чолга да ушан еҥ-влакым йырже чумырен, мер толкыным вияҥдаш амалым ыштен.

Эртыме корнынам шарнышаш улына, йылмынам, тÿвыранам аралымашке надырым пыштыше шанчызе-влакымат палыман. Тыгай еҥ-влак кокла гыч иктыже – Орлов Николай Матвеевич. Тудо Марий калыкын II погыныштыжо лийын, кугурак-влаклан «У куралше» икымше марий букварьым ыштен. Куандара, Провой калык шке Талешкыжым шарна. Таче сакыме шарнымаш оҥа ончыкылык тукымланат тудын нерген ушештараш тÿҥалеш. Тыге историйна аралалтеш. Да тукымвожшым палыше еҥ виян, тудым нимогай тÿтан мардежат куклен луктын огеш керт.

Поснак кугу тау Россий кÿкшытан VIII Марий самырыктукым слётын чолга ÿдыр-рвезыж-влаклан. Слётышто шочшо проектдам (семинарым) илышыш шыҥдареда – тиде сай лектыш! Тыгодым икте-весе-дене кылым кучен иледа, ваш-ваш полшеда. Тиде тыгак лийшаш. Посна укшым вашке тодылыт, а ик аршашыш чумыргышо шуко укшым тодылаш моткоч неле.

Шергакан таҥ-влак, умбакыжат усталык да уш-акыл мастарлыкда пÿсö лийже. Тÿҥалме пашада воранен толжо. У деч у сеҥымашым, сай лектышым тыланем. Тек тукымна кугезына гаяк патыр лиеш!

Пагален, Марий Оньыжа Э.В. Александров.